Дүүн, май 6-да, Тываның Журналистер эвилели Радио хүнүнге уткуштур республиканың радиожурналистериниң аразынга "Хөглүг старттарны" эрттирген. Аңаа баш бурунгаар киржири-биле бижиткен 5 команданың үжү - "По кайфу"(Голос Азии), "ЕщёнеПозднеры" (радио"Звезда"), "ТелеРад" (хоочуннар) киришкен.
Тыва радионуң хоочуннары - Тываның алдарлыг ажылдакчызы, журналист, чогаалчы Лидия Иргит, Тываның алдарлыг журналистери Светлана Данзын-оол, Юрий Дарбаа, Тываның алдарлыг ажылдакчызы Татьяна Ооржак база оларның командазынче ТЖЭ-ниң кежигүнү, билдингир чурукчу, Тываның национал тугунуң эскизиниң автору Оюн-оол Сат киргеш, болган хемчегниң киржикчилеринге үлегерин көргүскеннер.
Хөглүг маргылдааның түңнелинде “ЁщенеПозднеры” (радио”Звезда”) команда тиилекчи болган. Олар оюннуң кол шаналы - ТЖЭ-ниң белеткээни тускай статуэтканы чаалап алганнар. Ийиги черге - “Голос Азии” радиоканалдың командазы, үшкү черге - хоочуннар төлептиг болганнар. Команда бүрүзү чигирзиг белек- торттарны тус-тузунда алганнар.
Ол хүн хоочуннар командазы демниин көргүзүп, аныяктардан чыдып калбайн, шупту оюннарга киришкени дыка солун болган. Тыва радионуң хүндүлүг хоочуннары тускай хол белектерин ТЖЭ-ниң мурнундан алганнар.
ТР-ниң Дээди Хуралының парлалга албанының даргазы, Тываның алдарлыг журнализи Юрий Дарбаа команда бүрүзүнден шылгараңгай киришкен ойнакчыларга бодунуң мурнундан тускай белектерни тывыскан.
Ниитизи-биле маргылдаага найырал тиилээн дижип, ооң киржикчилери омак-хөглүг түңнээннер. Аныяктар - алдар-аттыг хоочуннар-биле таныжып алганынга, хоочуннар - аныяк үезин сагындырган солун хемчегге киришкенинге өөрүп тарааннар.
Чуруктар Юрий Дарбааның
#Шынсолун#Радиохүнү#ТываныңЖурналистерэвилели
Радио Тувы ₪ "Голос Азии" Кызыл, Тыва, 102.5fm
ГТРК "Тыва"
Телеканал «Тува 24»
https://vk.com/soiuz.zhurnalistov_tuva?z=video-130943..
