Республиканың Көдээ ажыл-агый яамызының медеглээни болза, 220 ажыг муң гектар черни кезип, 219 муң тонна сиген-ширбиилди бөлген. 226 594 тонна мал чеми белеткээр планны 107,5 хуу күүседип, 243429 тонна чедирген.
Республиканың шупту кожууннары планныг онаалдазын күүсеткен. Мөңгүн-Тайга биле Эрзин кожууннар сиген-ширбиил шөлдери эвээш болганындан, эвээш мал чемин белеткээн. Регионалдыг Көдээ ажыл-агый яамызы ол муниципалитеттерни онза хыналдада салган. Ведомство мал чеминиң чедишпезин болдурбас дээш, кожа кожууннардан база Красноярск край база Хакасиядан сиген садып алырын организастаан.
Көдээ ажыл-агый бүдүрүкчүлери 1 145 тонна сигенни муниципалдыг курлавырга белеткээр ужурлуг. Амдыызында планны 97 хуу күүседип, азы 1110,2 тонна курлавырны кылган.
Мал чеминиң белеткелинге 842 тракторну, 490 чүък машиназын, 259 бөлер-тырыыр, 658 кезер база 393 дырбааштаар техника аймаан хаара туткан. Хову ажылдарынга үш муң ажыг кижи ажылдаан.
Көдээ ажыл-агый сайыды Юрий Оруспайның илеткелиниң соонда регионнуң удуртукчузу Владислав Ховалыг хожудап турар муниципалитеттер чем белеткелин доозар ужурлуг деп даалганы салган. Тус чер чагыргаларының даргалары мал чеминиң шупту хевирлерин үе-шаанда чыырын организастап, муниципалдыг курлавырже киирер.
ТР-ниң Чазааның парлалга албаны.
Чурукту интернет четкизинден хоолгалаан.
«Шын» №84 2024 чылдың ноябрь 2
