Республиканың ажыл-агыйларында мал чеминиң белеткели кидин түлүк. Тываның Чазаанда оперативтиг штабка кылдынган ажылдың дугайында неделя санында илеткеп турар. Регионалдыг Көдээ ажыл-агый яамызының медеглээни болза, 227 744 тонна мал чеми белеткээр планны 60 хуу чедирип, 126746 тоннаны кезип алган.
Мал чемин белеткээни:
- хөпээннер – 105 588;
- 50 килдиң хөпээннери – 7 531;
- 350 килдиң дүрүглери – 82 688;
- 500 килдиң дүрүглери – 14 934.
Шупту 17 кожуундан беш кожуун мурнуку черже үнген:
Тожу планының 85 хуузун, азы 1516 тоннаны;
Бии-Хем – 76,9 хуузун азы 10086 тоннаны;
Сүт-Хөл – 72,7 хуузун азы 13170 тоннаны;
Чөөн-Хемчик – 64,5 хуузун азы 11864 тоннаны;
Улуг-Хем – 64,3 хуузун азы 11299 тоннаны белеткээн.
Таңды, Чеди-Хөл, Эрзин кожууннар айыткан көргүзүглеринде четпээн.
Сиген кезилдезиниң ажылдарында шупту 3 муң ажыг кижи хаара туттунган, 1449 сигенчилер бригадазы тургустунган, оларның 312-зи механизастаттынган болза, 1137-зи хол-биле кезер.
Күскү хову ажылдарында 446 чүък машиналарын, 759 трактор, 546 кадыыр, 419 дырбааш, 241 сиген тырый бастырар дериг-херекселдерни ажыглап турар.
Малга быжыг чем курлавырын тургузуп алыры – кышты хүр ажарынга магадылал. Тываның Баштыңы Владислав Ховалыг ийи чыл бурунгаар мал чеминиң республика курлавырын тургузар негелдени салганын сагындыраал. Кыштың кончуг сооктарында мал чеминиң быжыг курлавыры кыштаглаашкынны ажып эртеринге малчыннарга улуг дузалыын эрткен чылдарның арга-дуржулгазы көргүзүп турар.
Амгы үеде муниципалдыг курлавырда 288 тонна сиген немешкен. Ол дээрге 1075 тонна сиген белеткээр планның 27 хуузу болур. Республиканың 17 кожууннарындан чүгле сес кожуун муниципалдыг мал чеминиң курлавырын белеткээринче кирген.
ТР-ниң Чазааның парлалга албаны.
Чурукту интернет четкизинден хоолгалаан.
«Шын» №69 2024 чылдың сентябрь 11
