Апрель айның баштайгы хонуктарында байдал-биле алырга, республиканың мал ажыл-агыйлыг бүдүрүлгелеринде төрүүр шээр малдың 35 хуу хирези оолдапкан, 200 муң ажыг анайлар болгаш хураганнар амгы үеде малчыннарның кичээнгейлиг ажаалда-тежээлдезинде.
Тываның агаар-бойдузунуң байдалынга хой-өшкү апрель айның ийиги, май айның бирги чартыында түлүктеп төрүүр. Баш бурунгаар санаашкыннар-биле алырга, бо чазын 539 муң хире анай-хураган төрүттүнер, шээр малдың саны 1,7 миллион чеде берип болур.
Хой, өшкүден аңгыда, 87 муң инек, 41 муң бе бо чазын төрүүр.
Амгы үеде Тывада 1,17 миллион хой, өшкү, 201,1 майыстыг бода мал, 99,5 муң чылгы мал, 13,7 муң хаван, 1,4 муң иви, 481 сыын, 253 теве бар.
Бо чазын төрүттүнген чаш малды улуг чидириг чок камгалап алыр талазы-биле бүгү талалыг дузаны малчыннарга чедирерин Көдээ ажыл-агый яамызынга Тываның Баштыңы Владислав Ховалыг дааскан. Ажыл чок эрге-байдалдыг 70 хамааты малчын коданнарда ажылдап, анай-хураганны ажаап-тежээринге дузалажып турар. Олардан аңгыда, Тываның күрүне университединиң көдээ ажыл-агый факультединиң, Тываның көдээ ажыл-агый техникумунуң студентилери база малчыннарның кыштагларында өөредилге практиказын эрттирип, оларга дузалажып турар.
"Шын" №27 2023 чылдың апрель 15
#Шынсолун #Тыва #Көдээажыл_агый #Малоолдаашкыны #Тывадыл