Кызыл хоорайның 17 дугаар «Салгал» уруглар садында аваларга «Мама-Гараж» деп коворкинг төвү ажыттынган. Аңаа ук уруглар садында кээп турар чаштарның болгаш хоорайның солагай талазында дачаларында хөй ажы-төлдүг, амыдыралы чегей, ажыл-агыйы чок, берге байдалда азы кадыының байдалы кызыгаарлыг төл азырап турар, бир болза чаш уруг азырап, узун шөлээде олурар авалар келгеш, чаа чүүлдерге өөренип, тускай специалистерниң арга-дуржулгазын алыр аргалыг.
«Мама-Гараж» — ук девискээрде аваларга психологтуг болгаш моральдыг дуза кадар чаңгыс-ла төп. Аңаа келген авалар янзы-бүрү курстарны, семинарларны дыңнап, сөөлгү үениң чаа мергежилдерин шиңгээдип, кижизидилге болгаш психология дугайында номнарны номчуп болур. Авалары төпке келгеш кичээлдеп турда, чаш ажы-төлү бичии уруглар ойнаарынга таарыштыр дериттинген өрээлге ойнап болур. Чаштарны тускай ажылдакчы карактаар.
Коворкинг төвүнде дараазында угланыышкыннар бар:
- бичии уругларның сайзыралынга ажыктыг херекселдер-биле дериттинген өрээл;
- ада-иелерге өг-бүле болгаш ажы-төл дугайында номнар, сеткүүлдерден тургустунган ном саңы. Аңаа номчаан номунуң дугайында сайгарар ужуражылгаларны психологтар эрттирер;
- аргыттынар-дааранырынга, дыргактар чараштап кылырынга, будуттунуп, чараштанырынга өөредир кичээлдер;
- кижиниң амы-хууда өзүлдезинге, тура-соруктуг болурунга, чон аразынга бодун канчаар шын алдынары, кадыкшыл болгаш күш-культура дээш оон-даа өске солун болгаш ажыктыг кичээлдер.
Бо бүгү ажыктыг хемчеглер күзелдиг аваларны манап турар.
Арынны Айдың ОНДАР белеткээн.
