Социал четкиде ТР-ниң Спорт яамызының арынынга аңгы-аңгы айтырыгларлыг чагаалар хөйү-биле кээп турар. Ооң аразында бир бижикчиниң чагаазын улуг сонуургал-биле номчааш, номчукчуларга таныштырар бодадым.
Чейнеш Манчыылай – маңнаар талазы-биле профессионал спортчу. Ол Кызылга төрүттүнген. Амгы үеде Новосибирск хоорайда ажылдап-чурттап турар. Эртеми эмчи. Бичиизинде танцы бөлгүмүнге барып турган, оон студентилеп тургаш, фитнес, пилатес, йога-биле өңнүктежип эгелээн.
“Школага күш-культура кичээлдери меңээ чалгааранчыг, стадионга маңнаары шуут хилинчек турган. Кажан хамчыктыг аарыг ковид өөскүп турар үеде маңнап эгелээн мен. Ажылдан, аарыг кижилерден чардыгып, эде тургустунар деп шиитпирлеп алган мен. Маңнаар талазы-биле школага бижидип алгаш, часка чедир тренерниң өөредилгези-биле шын маңнаарының техниказын өөренип алгаш, оон кудумчуга бодум маңнап эгелээр деп сорулга салып алган мен. Чоорту ол спортка хандыкшып, маңнаар эш-өөр-биле найыралдажып, маңнаар спорт делегейинче шилчи бердим: маргылдаалар, спортчу идик-хеп, тренировкалар, чараш медальдар, кол-ла чүүл — сорук кирген спортчулар, оларның хандыкшылы, энергиязы. Ынчалдыр спортчу өг-бүлемни тып алдым” – деп, Чейнеш бижип турар.
Ол 2023 чылда марафонга киржип эгелээн. Кады халыыр эжиниң: "Делегейде кижилерниң чүгле 1 хуузу марафонга халыыр салымныг" дээн чугаазын ол черле утпас. Ол чугаа соонда бодунуң күжүн шенеп көөр деп сорулга салып алган.
Маңнааш, улуг-улуг чедиишкиннерлиг болганын база бижип турар: “Фиништиң шыйыын эрте маңнаан соонда, дыка улуг аас-кежик, хей-аът көдүрлүүшкүнү, ооң-биле чергелештир бодунга чоргаарал, бүзүрел оттуп келир. Финиш соонда улам маңнаксаар апаар сен, езулуг наркотик-биле дөмей, чаңгыс катап шенээш, олчаан адырылбайн баар.
Маңнаанымның ачызында дыка хөй аян-чорук кылдым. Маңнаан үем дургузунда аңгы-аңгы хоорайларга 14 чартык марафонну (21,1 км): Красноярск, Новосибирск, Томск, Омск, Казань, Самарканд, Стамбулга, 3 бүдүн марафонну (42,2 км) 2023, 2024 чылдарда Питерге ийи катап, 2024 чылда Москвага маңнап эртим”.
Чейнеш Токио биле Нью-Йоркка мейджор-марафонга киржир күзелдиг. Маңнаары дээрге-ле хосталга-дыр, амыдырал-дыр, ол дээрге бодунуң организминге ынакшыл-дыр деп кыйгыны Чейнеш бижип турар.
Аныяк эмчи, марафончу Чейнешке быжыг кадыкшылды, улуг спортчу чедиишкиннерни күзеп каалы.
А.ЧАМБАЛ-ООЛ.
Чурукту социал четкизинден алган.
“Шын” №87 2024 чылдың ноябрь 13