Тыва, Хакас республикалардан база Красноярск крайдан сан башкыларының чыынды командалары киришкен «Математика тулчуушкуннары» деп регионнар аразының маргылдаазы доозулган.
Математика тулчуушкуну команда-биле ажылдап билирин, сан билиглеринге ханы билиглиин көргүскен шылгараңгайларның оюну болур. Эң хөй сан ойнап алган команда тиилээр.
“Енисей Сибириниң” 11 дугаарлыг өөредилге-педагогика округунуң Красноярскының педагогика университединиң удуртулгазы-биле хемчеглер планы езугаар регионнар аразының маргылдаазы болуп эрткен.
Бо маргылдаага алды: Тыва Республикадан, Хакас Республикадан база Красноярск крайдан ийи-ийи команда ниитизи-биле 30 башкы киришкен. "Сферум" шөл таварыштыр онлайн хевирге хемчегни эрттирген.
Тыва Республиканың Математика башкыларының ассоциациязы маргылдааны канчаар эрттирерин ажылдап кылган болза, В.П. Астафьев аттыг Красноярскының педагогика университединиң башкылары мергежилгелерни белеткээн. Мергежилгелерни кызыгаарлаттынган үелиг үш чадада кылыр.
Өөредилге сайыдының хүлээлгезин күүседип турар Ренат Ооржак киржикчилерге байыр чедиргеш, дипломнарны база өртектиг шаңналдарны тывыскан. Маргылдааның түңнелинде, бирги черни Красноярск крайның 1 дугаар командазы, ийиги черни — Тываның 2-ги командазы, үшкү черни — Хакасияның 2-ги командазы, дөрткү черни Хакасияның 1-ги командалары ээлээн.
А. МОНГУШ.
«Шын» №94 2024 чылдың декабрь 7