"Чагыдылга дээш телевизор" акция
2021 чылдың ийиги чартыында «Шын», «Тувинская правда», “Тываның аныяктары” болгаш “Сылдысчыгаш” уруглар солуннарның кайы-бирээзин май 1-ден июнь 20-ге чедир чагыдып алгаш, квитанциязын чоруткан чагыдыкчылар аразынга «Тывамедиабөлүк” Парлалга бажыңы “Чагыдылга дээш телевизор” деп ойнаашкын акцияны чоруткан.
Республика солуннарын чагыдып алганы дээш тускай шаңналдарлыг акцияга ниитизи-биле 182 кижи киришкен. Оларның аразында “Тува 24» телеканалдың “Сеткилимниң ханызындан” деп теледамчыдылгазынга хөгжүмнүг байыр чедирер (сертификат) шынзылга, бадыткал бижикти база «Шын», «Тувинская правда», “Тываның аныяктары” болгаш “Сылдысчыгаш” уруглар солуннарның 2022 чылдың ийиги чартыында чагыдылгазынче сертификаттарны ойнадып алган аас-кежиктиг чагыдыкчылар бар.
Лотерея ойнаашкынның кол шаңналын Бай-Тайга кожууннуң Шуй суурнуң чурттакчызы Меңги Сыргымай чаалап алыр аас-кежиктиг болган. Чоокта чаа, “Тывамедиабөлүктүң” корреспондентилери чагыдыкчының ойнадып алган телевизорун Сыргымай Оолаковичиниң бажыңынга чедирип берген.
“Чагыдылга дээш телевизор” деп ойнаашкын акцияның тиилекчизи Меңги Сыргымайның кады төрээн угбазы Елизавета Сыргымай телевизорну хүлээп алгаш, өөрүп четтиргенин илеретти.
– Совет үеде ада-иевис база “Шын” солунну чагыдып ап, доктаамал номчуп чораан. Бо хүннерде оларның уруглары болур кады төрээн дуңмам Меңги-биле база солунну чагыдып ап, номчуп чор бис. “Чагыдылга дээш телевизор” деп ойнаашкын акцияның дугайында “Шын” солундан номчааш, черле чүвени канчап билир дээш, чагыдылга квитанциязын почта таварыштыр чоруткан бис. Үр болбаанда харыызы чедип келди. Ону соталыг телефон дамчыштыр дуңмам Меңги боду билип алган болду. Бодунуң меңээ чугаалааны-биле алырга, ойнадып алырынга ол бүзүреп турган, черле сагыжы эндевээн болду” – деп, Меңги Сыргымайның кады төрээн угбазы Елизавета Сыргымай өөрүшкүзүн чажырбайн чугаалады.
Республикада “Шын” база “Тувинская правда” ниитилел-политиктиг солуннарны доктаамал чагыдып, номчуп турар улустуң саны-биле алырга, бирги одуругда Чөөн-Хемчик, ийиги черде Бай-Тайга, үшкү-дөрткү одуругда Улуг-Хем болгаш Сүт-Хөл, ол ышкаш Чаа-Хөл, Эрзин кожууннар 4-5 дугаар черлерни ээлеп турар. Республика солуннарын чагытканы дээш ойнаашкыннар моон-даа соңгаар уламчылаар, ынчангаш, чагыдыкчыларны идепкейлиг киржиринче чалап тур бис.
Мерген ОНДАР.
Буян ООРЖАКТЫҢ тырттырган чуруу.
#Чагыдылгадээштелевизор #Акция #Бай_тайгакожуун #Тыва #Тува #Тувамедиагрупп #Тывадыл #Тывамедээ #Tuva #Shyntuva