Октябрь 18-те Тыва үндезин культура төвүнге республика чергелиг ыяштан биче хевирниң скульптураларын чазаарынга эрттирген мөөрейни түңнээн.
Россияның чоннарының культурлуг өнчү чылынга тураскааткан Донгак Окаанчык аттыг бо мөөрей беш хонук дургузунда уламчылаан. Аңаа Мөңгүн-Тайга, Чаа-Хөл, Эрзин, Таңды, Чөөн-Хемчик, Барыын-Хемчиктен ниитизи-биле 10 мастер киришкен.
Мөөрей киржикчилериниң кылган ажылдарын жюри кежигүннери: Россияның чурукчулар эвилелиниң кежигүнү, Тываның уран чүүлүнүң алдарлыг ажылдакчызы Александр Ойдуп, Россияның культуразының алдарлыг ажылдакчызы, Тываның улустуң чурукчузу Начын Шалык болгаш Тываның улустуң мастери Сайдаш Момбужай үнелеп көрген.
Түңнелинде, шаңналдыг черлерже дараазында мастерлер кирген:
Бирги черни «Мерген-Кежик» деп ажылды кылгаш, Таңдыдан келген мастер Аңчы Очур ээлээн. Чөөн-Хемчиктен келген мастер Начын Монгуштуң «Хоор чоннуң хөөмей- жизи – Хорагай Ооржак» деп ажылы ийиги черни ээлээн. Мөңгүн-Тайгадан “Далган” деп ажылды кылган Арим Иргит үшкү черге төлептиг болган.
Шаңналдыг черже кирген мастерлер тус-тузунда акша шаңналдарын алган.
Биче хемчээлдиг ыяштан хевир-дүрзү чазаарын сайзырадыр сорулгалыг мөөрей Тыва үндезин культура төвүнүң хериминиң иштинге эрткен. Киржикчи бүрүзүнге 50 сантиметр пөштү аңгылаан турган.
Ук мөөрейни эрттиреринге херек материал талазы-биле деткимчени Тываның Культура яамызы болгаш Алдан-Маадыр аттыг Национал музей көргүскен.
Сорунза Монгуш.
Тыва үндезин культура төвүнүң медээзи-биле.
