Ноябрь 5-те Кызыл хоорайның Төлээлекчилер хуралының ээлчегден дашкаар сессиязынга депутаттар Карим Сагаан-оолдуң Кызылдың мэри бүрүн эрге-хүлээлгелерин хуусаа бетинде соксадыр дугайында шиитпирни хүлээп алгаш, мэрниң албан-хүлээлгелерин түр када күүседир кижини томуйлаан.
Кызылдың Төлээлекчилер хуралының даргазы Ирина Казанцеваның чугаалааны-биле алырга, депутаттарның ындыг шиитпири чөптүг барымдаалыг. “Карим Сагаан-оол керээде хүлээлгелерни күүсетпейн турарының дугайында билдириишкинни хоорай судунче 2024 чылдың декабрьда киирген. Ону бирги инстанцияның судунуң шиитпири бадыткаан. Ынчалза-даа мэрияның удуртулгазы ТР-ниң Дээди судунга апелляцияны киирген. Суд сайгарылгаларының түңнелинде ТР-ниң Дээди суду депутаттарның шиитпири хоойлуга дүүшкенин доктааткан” – деп, Ирина Казанцева дыңнаткан.
Кызыл хоорайның мэриниң албан-хүлээлгезин түр када күүседиринге Вячеслав Сүгдер-оолду томуйлаан. Ол Кызылдың мэриязының архитектура, чер болгаш өнчү-хөреңги хамаарылгаларының департаментизиниң удуртукчузунга ажылдап турган.
Бистиң корр.
Чурукту “ТываМедиаБөлүктен” алган.
“Шын” №43 2025 чылдың ноябрь 6
