Россияның Чазааның Даргазы Михаил Мишустин 2025 чылда федералдыг чазактың ажыл-чорудулгазының дугайында илеткелинде Тываны айыткан. РФ-тиң Президентизиниң даалгазы-биле ажылдап кылган хөгжүлдениң бот-тускай программалары чедиишкинниг боттанып турар регионнар аразында республиканы демдеглээн. Регионнар бо программаларның ачызында боттарының экономиказынче миллиард рубльдиң хуу инвестицияларын хаара туткан.
Тываның Баштыңы Владислав Ховалыг регионнуң хөгжүлдези федералдыг чазактың кол кичээнгейинде болуп артканын демдеглээн:
«Бо деткимчениң ачызында херек кырында болган улуг өскерлиишкиннерни көрүп турар бис: эрткен чылын регионнарның кол адырлары – үлетпүр, көдээ ажыл-агый, туризмче 30 млрд рубльге хуу инвестицияларны хаара туткан. Бүгү чуртта 108 млн дөрбелчин метр чуртталга шөлүн дужааган, а Тывада ол көргүзүг 2020 чылга деңнээрге 4,2 катап хөй, азы 2025 чылда 467 муң дөрбелчин метр болган. Бис аңаа кызыгаарланмайн, темпини ам-даа улгаттырар бис» - деп, ол бодунуң MAX мессенджер каналынга бижээн.
Чылдың түңнелинден көөрге, Тывада чуртталга тудуун дужаары 36,9 хуу өскен. Үүрмек садыг-саарылга 14,6 хуу, төлевирлиг ачы-дуза хемчээли 13 хуу өскен, а бүрүткеттинген ажыл чок чоруктуң деңнели рекордтуг 2,5 хууда келген. Чурттакчы чоннуң боттуг орулгалары 6,6 хуу өзүп, албан езузунуң инфляциязын ашкан.
2025 чылда ИПСЭР күүселдези-биле шакта 200 куб метр бетон бүдүрер күчүлүг ийи шугумну ажыглалче киирген. «Хандагайты» автомобиль эрттирилге пунктузун эде чаартыр ажылдарның бирги чадазы доозулган, ооң-биле холбаштыр тускай экономиктиг зонаны тудары планнаттынган.
Белен бажың комплекизин бүдүрер бүдүрүлге, ол ышкаш бүдүн чыл дургузунда бедик шынарлыг мал продукциязын бүдүрер мал ажыл-агый комплекизин тудар төлевилелдерни боттандырарынга белеткел ажылдары доозулган. Владислав Ховалыгның демдеглээни-биле алырга, республиканың Чазаа Тываның инфраструктуразын хөгжүдеринче, чаа ажылчын олуттарны тургузарынче, чурттакчыларның амыдырал-чуртталгазының шынарын бедидеринче угланган федералдыг деткимчени моон-даа соңгаар ажыглаар.
ТР-ниң Чазааның парлалга албаны.