Россия Федерациязының кадык камгалал сайыды Михаил Мурашко Тыва Республикага ажыл албаны-биле кээп чорааш, четкен бир объектизи — республиканың онкология диспансери болган. Регион чаа онкотөптү тудар саналды киирерге, чурттуң Президентизи инициативаны деткээн. Бо чылдың октябрьда тудуг объектизиниң «орук картазы» ажылдап эгелээн. Федералдыг кадык камгалал яамызы Владимир Путинниң даалгазы езугаар оран-саваның дөзевилелинче акша-хөреңгини үндүрген.
Бөгүн республиканың онкология диспансериниң баазазында амбулаторлуг поликлиника албаны, клиниктиг диагностика лабораториязы ажылдап турар. Ол ышкаш ыжыкка удур эм-таң-биле эмнээр, радиотерапия, торакалдыг болгаш абдоминалдыг онкология, онкогинекология база эмиг бестериниң ыжыының, реанимация база интенсивтиг терапия, паллиативтиг салбырлар ажылдап турар.
Кол эмчи Омак Ондар Федералдыг кадык камгалал яамызының удуртукчузу Михаил Мурашко база регионнуң баштыңы Владислав Ховалыгга онкодиспансерниң ажылының кол угланыышкыннарын болгаш көргүзүглерин, ол ышкаш диагностика база эмнээшкин, лаборатория дериг-херекселдериниң ажыглалын таныштырган.
Федералдыг сайыт эмнелге албан черин эргий кезип хынаан соонда, диспансер «Кадык камгалалы» национал төлевилел-биле алган эмчи дериг-херекселдерин шын ажыглап турарын демдеглээн.
— Онкология албанында келген хөй санныг дериг-херекселдер аарыгны баш бурунгаар илередириниң шынарын экижидип, аарыг кижилерни үе-шаанда шын эмнеп эгелээр арганы берген. Эмнер терапиязы, херел-биле эмнээр терапия база ында кирип турар-дыр – деп, Михаил Мурашко демдеглээн.
Диспансерде чылда-ла 1500 хире аарыг кижи эмнедип турар. 600 ажыг кезиишкиннер, 5000 ажыг патоморфологтиг шинчилелдерни кылып турар.
2020 чылдан бээр «Кадык камгалалы» национал төлевилел күүселдези-биле онкодиспансер «Ыжык аарыглары-биле демисел» федералдыг программадан 31 санныг эмнелге дериг-херекселдерин садып алган. Эмчилер эмнээшкинниң чаа арга-хевирлерин ажыглап, ыжык аарыг кижилерниң сегип үнүп кээриниң көргүзүүн экижиткен.
ТР-ниң Чазааның парлалга албаны.
