«Убса-Нур ыйгылаажы» деп биосфераныӊ кызыгаарлар аразында онза камгалалдыг девискээрин башкарар талазы-биле российжи-моол холушкак комиссияныӊ тос дугаар хуралы Кызылга болуп эрткен.
Аӊаа Россияныӊ Бойдус курлавыр болгаш экология яамызыныӊ, Моолдуӊ бойдус хүрээлеӊиниӊ болгаш агаар-бойдус ѳскерлиишкиннериниӊ яамызыныӊ болгаш ук заповедниктиӊ тѳлээлери, эртемденнер база бойдустуӊ онза камгалалдыг девискээрлериниӊ директорлары киришкен.
Россияныӊ делегациязын И.Ю. Маканова, а Моолдуӊ – У. Энхтвайн баштаан. Ужуражылга үезинде 2023–2024 чылдарныӊ түӊнелдерин үндүрүп, 2025 чылдыӊ планын чугаалашкан. Ховар дириг амытаннарны камгалаарын, рейдилерже кады үнерин, ѳрт айыылын болдурбазын болгаш экологтуг чырыдыышкын чорударын ажылдыӊ кол угланыышкыннарынче киирген.
Тывада «Убса-Нур ыйгылаажы» заповедниктиӊ «Миллиард ыяш тарып олуртур» тѳлевилелге киришкенин комиссия эки деп үнелээш, Моолга питомниктер тургузар талазы-биле арга-дуржулгазын солчурун сүмелээн. Кызыгаарлар таварып эртер турисчи маршрутту кады ажылдап кылырын планнаан.
Азия диптиӊ ховуларынга турум чурттап чораан «кулан» азы Пржевальскийниӊ аъды деп черлик аъттыӊ уксаазын катап тургузарын, ирбиштиӊ ѳзүп кѳвүдээр байдалын хүн чурумунга сайгарып чугаалашкан. Комиссия он дугаар юбилейлиг хуралын 2025 чылдыӊ үшкү кварталында Моолга эрттирер.
«Убса-Нур ыйгылаажы» заповедниктиӊ медээлеринден.
“Шын” №87 2024 чылдың ноябрь 13
