Бии-Хем кожууннуң Туран хоорайда «Мобильдиг УСК» деп төлевилел ажылдап эгелээн. Төлевилел бо чылдың сентябрь 10-да чаңгыс аай соңгулда хүнүнде боттанып эгелээр.
Ук төлевилелдиң сорулгазы – соңгукчуларны шынарлыг медээлер-биле хандырары. Ол дээрге соңгулда үезинде соңгукчуларның персоналдыг медээлери-биле УИК (участок соңгулда комиссиязының) кежигүннериниң ажылдаар чаңгыс аай электроннуг программалыг модулю-дур. Бир эвес соңгукчулар регионга соңгулдалар кажан болурун билбес болза, участок комиссиязының төлээлери шупту айтырыгларга харыылап бээр.
Ол сервисти бир дугаар Бии-Хем кожуунга шенээр деп шиитпирлээн. Август 30-ден сентябрь 5-ке чедир Төлээлекчилер хуралының чедиги чыыжының баш бурунгаар соңгулдалары болур. Ук төлевилел соңгукчуларны сонуургадыптар болза, ону 2024 чылдың март айда президент соңгулдаларынга база Россияның бүгү регионнарынга соңгулдаларга ажыглаар.
Девискээрниң соңгулда комиссиязының даргазы Лана Шыыраптың чугаазы-биле алырга, Тывадан чаңгыс соңгулда комиссиязы ук төлевилелге киржип турар, ол дээрге Россияның 78 регионнары-биле бир деңге Туран хоорайның «Туранская Центральная» 118 дугаарлыг УИК ажылдаар.
«Кожууннуң девискээринде 925 соңгукчу, 476 өреге база бажыңнар эргиир соңгулда комиссиязының 4 кежигүнү бар. Ук участок соңгулда комиссиязының 4 кежигүнү Россияның Төп соңгулда комиссиязының шугуму-биле өөредилгени эрткеш, «Мобильдиг УИК» деп мобильдиг капсырылгаже кирер эргени алган. Бажыңнар эргиир кежигүннер хамаатыларга 8 айтырыгны салгаш, оларны болур соңгулдага киржиринче чалаар. Хамаатылардан медээлерни ап тургаш, оларның хуу медээлеринге камгалалды бээр» — деп, Лана Шыырап чугаалаан.
Анна Дьяченко «Мобильдиг УИК» төлевилге киржир аас-кежиктиг болган. Бажыңнар эргип турда, кижилер ону эки хүлээп, чаа капсырылга дугайында сонуургап айтырып турза-даа, боттарының хуу медээлерин бээринден ойталаар улус база бар дээрзин ол дыңнаткан.
Бажыңнар эргиир соңгулда комиссиязының кежигүннери бейджиктерлиг, тускай хептерлиг, «Мобильдиг УИК» капсырылганы киирип каан планштеттерлиг ажылдаар. Соңгукчулар-биле ужуражып тургаш, олар соңгулданың болур хүнүн, шагын болгаш каяа эртерин чугаалап бээр.
Бир комиссия кежигүнүнге-ле ортумаа-биле 119 өреге хамааржыр. Ол ийи үеде эртер: бирги чалгыы август 31-де эгелээн, а ийигизи сентябрь 8-ке чедир. Сентябрь 2-ниң көргүзүү-биле дөрт комиссия кежигүнү 145 өрегени эргээн.
Бистиң корр.
