2024 чылда Тыва ССРЭ-ниң составынче Тыва Арат Республиканың эки тура-биле каттыжып киргениниң 80 чылын демдеглээр. Регионнуң Баштыңы Владислав Ховалыг бо болуушкунга тураскааткан калбак ниитилел-политиктиг хемчеглерни бедик деңнелге эрттирер даалганы республика Чазааның мурнунда салганын ТР-ниң Дээди Хуралынга бодунуң Айыткалында айыткан. Культура яамызынга белеткел ажылдарын эгелээр даалганы берген.
«1941 чылда Ада-чурттуң Улуг дайынында ССРЭ-ниң бирги эвилелчизи, ооң соонда дайын чылдарында ооң составынче киргени хөй национал чоннарның тургусканы чурттуң чаңгыс демниг болурунга база оларның ниити күжениишкиннери-биле Төрээн чуртунуң сонуургалдарын камгалаарынга онза чугула черни ээлеп турар»– деп, Владислав Ховалыг демдеглээн.
Юбилейлиг хүннерде Москвага Тываның культура болгаш уран чүүл хүннерин бо чылын катап эгидер деп турарын Тываның Баштыңы чугаалаан.
Россияның составынче Тываның эки тура-биле каттышканының 80 чылында республиканың чурттакчылары солун программаларны, шиилерни болгаш чогаадыкчы төлевилелдерни көөрлер деп, Владислав Ховалыг республиканың Культура яамызынга бүзүрелин илереткен.
Культура сайыды Виктор Чигжит ТР-ниң Дээди Хуралынга Тываның Баштыңының Айыткалынга хамаарыштыр бодунуң бодалын илередип тура, улуг ужур-уткалыг төөгүлүг хүннү байырлаарынга белеткел эгелей бергенин дыңнаткан:
– Тываның Баштыңы бодунуң Айыткалында яамының эрткен чылда ажылынга бедик үнелелди берген. Ол дээрге Москвага Тыва Рспубликаның культура хүннеринге тураскааткан хемчеглер-дир. Республиканың удуртулгазы ол төлевилелдерни деткээн, ам-даа деткиири биске чугула. 2024 чылда Россияның Камгалал яамызының Культура департаментизи-биле удур-дедир кады ажылдап, «Тыва Республикада армейжи культура хүннери» деп патриотчу төлевилелди уламчылаар бис.
ТР-ниң Чазааның парлалга албаны.
«Шын» №5 2024 чылдың январь 24