Национал байырлал Наадымның кол хемчеглери Тос-Булакка өг хоорайжыгашка болуп эрткен. Аңаа республиканың аңгы-аңгы кожууннарының чагырга черлери өглер мөөрейинге киириштирер дээн бүрүн дериглиг өглерин эккеп тиккен. Ол-ла черге Наадымның чемпион малчыннарын шаңнаан.
ТР-ниң Баштыңы Владислав Ховалыг чаңчыл езугаар Тос-Булакта чараштыр дерээн өглерни сонуургап көргеш, мурнакчы малчыннар-биле ужуражылганы эрттирген. Ужуражылганың кол темазы — чымыштыг мал ажылының орулгаларын өстүрериниң дугайында болган.
«Мурнакчылар аразында чүгле улуг назылыглар эвес, а аныяктарның бар болганынга аажок өөрдүм. Көдээ черлерде мал ажылы кылып чоруур аныяктар база бар-дыр дээрзин билдим. Бистиң хоочуннарывыстың дуржулга дамчыдып болур улузу бар-дыр. Чедиишкинниг болур дээш, орулгаларны болгаш чарыгдалдарны таарыштыр өйлээри чугула» – деп, ол чугаалаан.
Азыраан малының продукциязын садып-саарарынга таарымчалыг байдаларны малчыннарга тургузар дээш, бүгү арганы удуртукчулар өөренип көрүп турарын В. Ховалыг малчыннарга тайылбырлаан. Көдээ ажыл-агыйны сайзырадырынга тускай социал-экономиктиг хөгжүлде федералдыг программа улуг деткимчени көргүзүп турар. Эът, сүт болбаазырадыры-биле аңгы-аңгы грантыларны бүдүрүлге черлери ап турар. Ук улганыышкынче тускай социал-экономиктиг хөгжүлде (ИПСЭР) программазындан эрткен чылын 187,57 сая рубльди үндүрген. А республика бюджединден «Материал-техниктиг баазаны экижидери» программаның деткимчези-биле 135,06 сая рубльди чарыгдаан.
Кандыг-даа деткимче акша-төгерик кижиниң күш-ажылының киржилгези чокта сүүзүннүг болбас.
Наадым –малчыннарның күш-ажылын үнелеп, мурнакчыларны шаңнап-мактаар байырлал. Чыл санында кожуун бүрүзүнден 3 мурнакчыны шаңнап турар. Бо чылын ниитизи-биле 51 малчын Наадымның чемпионнары болган.
Бистиң корр.
"Шын" №55 2024 чылдың июль 24
