Тываның Баштыңы Владислав Ховалыг Дээди Хуралдың депутаттарының мурнунга Чазактың ажылының дугайында отчетту таныштырып тура, республикада национал төлевилелдерниң боттанылгазын база илеткээн.
Республика 11 национал төлевилелде чедиишкинниг киржип турар, ооң 2022 чылда акшаландырыышкыны 9,9 млрд. рубль, 2021 чылга (4,4 млрд.) деңнээрге 2,3 катап көвей болган. 2022 чылда национал төлевилелдер талазы-биле план езугаар күүселдези 94,6 хууну тургускан.
«Айыыл чок шынарлыг оруктар» төлевилел-биле 12 орук участоктарының байдалын экижиткен. Бояровка – Доора-Хем автооруктарга көвүрүглерни кылган. Орук шимчээшкининиң дүрүмүн фото-видео-биле хайгаараар 64 комплексти тургускан. Пассажирлер аргыштырылгазынга 36 автобусту саткан. Росавиация-биле идепкейлиг ажылдаанывыс түңнелинде Москва, Красноярск, Новосибирск, Иркутск болгаш Улан-Удэ хоорайларже субсидиялыг авиарейстерниң күүселдези өскен деп, Влдаислав Ховалыг илеткээн.
«Экология» национал төлевилелге киришкеш, өрт өжүрер болгаш арга-арыг ажыл-агый техниказын элээн чаартыр аргалыг болган. Кадыг бок артынчыларының полигонун база чылда 70 тонна бок ылгаар күчүлүг комплекс тудуун төлевилээр ажылдар чоруп турар. Чөпшээрел чок бок төгер черлерни узуткаар улуг ажыл эгелээн. Чуртталга-коммунал ажыл-агый объектилерин чаартыр талазы-биле даңзыда бирги регионнар санынче Тыва кирип турар. 600 ажыг миллион рубльди камгалап алганын республиканың Баштыңы дыңнаткан.
«Демография» нацтөлевилелдиң иштинде 5 уруглар садтарының тудуглары доозулган. «Өөредилге системазының школаларын чаартыры» федералдыг программаның ачызында 27 школага капиталдыг септелгени чоруткан.
Чазак Даргазы «Өөредилге» национал төлевилел-биле 10 школа тудуу эгелээнин дыңнадып тура, ол дээрге 7 муң чаа олуттар-дыр дээрзин чугаалаан. Улуг-Хем кожууннуң Чодураа сумузунга чаа школа тудуун «Көдээ черлерниң комплекстиг хөгжүлдези» программа таварыштыр камгалап алган.
Федералдыг чаа форматтарны ажылдаткан. Ол дээрге салым-чаяанныг уругларга «Сириус» өөредилге шөлү база «Креативтиг үлетпүр школазы», кванториумнар-дыр.
Башкыларга социал деткимче кылдыр «Мээң башкым» төлевилелди тургускан. Ооң кол сорулгазы – башкыларның мергежилиниң шынарын бедидери. Ол дугайында башкыларның республика съездизинге чугаалашканын В. Ховалыг айыткан.
Эрткен чылын кадык камгалалынче 11 млрд ажыг рубльди углаан. Үш чаа ФАП база 3 эмчи амбулаториялары ажыглалга кирген. Капитал септелге соонда Республиканың 1 дугаар эмнелгезинге чаа корпус ажыттынган, ол ышкаш Сүт-Хөлдүң база Чеди-Хөлдүң төп эмнелгелери, Чөөн-Хемчиктиң кожууннар аразының медицина төвүнге септелгелерни кылган. 21 мобильдиг медицина комплекстерин саткан. Уруглар эмнелгези, туберкулезка удур эмнелге, онкология эмнелгези дээн ышкаш улуг объектилерни төлевилээр ажылдар чоруп турар. Республиканың 1 дугаар эмнелгезинде чаа салбырлар ажыттынган, ооң иштинде тускай кардиохирургия салбыры база. Чонга бедик технологиялыг медицина дузазын көргүзери көвүдеп турар.
Кадрлар быжыглаар талазы-биле хемчеглерниң түңнелинде медицина ажылдакчыларының республикадан дашкаар чорууру эвээжээн.
#Тываныңчазааныңотчеду #Владиславховалыг #Националтөлевилелдер #Шынсолун #Тывадыл
