Төптүң кол сорулгазы – ВДНХ делгелге-шуулганының өнчүзүн кадагалаары болгаш РФ-тиң чедиишкиннерин көргүзери. «Россия» национал төп «Экспотөпке» турар. Ук айтыышкынга РФ-тиң Президентизи В. Путин атты салган.
Ооң мурнунда медеглээни болза, «Россия» делгелгезин дооскан байырлал 2024 чылдың июль 6-да болур. Делгелгениң ажылы июль 8-те доостур.
«Россия федерациязының чедиишкиннерин көргүзер, аңгы-аңгы аймактарның бот-боттарындан ылгалып турар езу-чаңчылдарын быжыглаар, чурту дээш чоргааралды хевирлээр, уругларның болгаш аныяктарның профессионал чаңчылдарын сайзырадыр, «Россия» делегей чергелиг делгелге-шуулганның өнчүзүн кадагалап арттырар сорулгалыг «Россия» делгелге-шуулганның удуртулгазы-биле Москва хоорайның «Экспотөп» деп делгелге комплекизинге «Россия» национал төптү тургузар» – деп, РФ-тиң Президентизи В. Путинниң Айтыышкынында бижээн. Төптү тудары-биле Краснопресненск хем эриинге черни аңгылаан.
РФ-тиң Садыг-бүдүрүлге палатазынга болгаш Москваның Чазаанга «Эскпотөпке» черни болгаш ында бар оран-саваны үш ай дургузунда «Россия» национал төпке дамчыдарын саналдаан. Дирекцияның бодунга төптүң төлевилелин болгаш тудуун кылыр харыысалгалыг организацияны тодарадырын дааскан.
Национал төптү федералдыг бюджеттен акшаландырарының дугайында Айтыышкында демдеглээн. «Россия» национал төптүң адырларын тургузарын регионнарга дааскан.
«Россия» делгелге-шуулганга сес ай дургузунда 17 сая кижи келгеш, сонуургап көрген дээрзин демдеглээри чугула.
А. ОНДАР белеткээн.
Чуруктарны интернеттен алган.
“Шын” №49 2024 чылдың июль 3
![](https://shyn.ru/media/cache/2024/07/05/cxras6urqnu-6b4e5f573f.jpg)