Кызыл хоорайның девискээринде орук септелгези уламчылавышаан. Бо хүннерде Кечил-оол кудумчузунуң оруун калбартып, дөрт транспорт халдып эртип болур кылдыр кылып эгелээн.
Шораан Чыргал-оол, ТР-ниң Орук болгаш транспорт сайыды:
– Кечил-оол кудумчузун септеп эгелей бергени бо. Септеп турар оруувус Титов, Магистраль, Бай-Хаак, Калинин кудумчуларындан келген транспорттуң каржып эртер, хайымныг чери болуп турар. Ынчангаш бо кудумчуну калбартыры чугула деп санааш, национал төлевилелдиң деткимчези-биле септеп кирипкен бис. Хөй-ниити аргыжылгазының автобустары база бо оруктап халдып турар. «Айыыл чок шынарлыг оруктар» национал төлевилелдиң деткимчези-биле Кызыл хоорайга ниитизи-биле 12 километр орукту септеп, чаартыры көрдүнген.
Сергей Белоусов, ТР-ниң Орук яамызының хөй-ниити чөвүлелиниң даргазы:
– Бо септеп турар кудумчувуста шимчээшкин кончуг улуг. Ынчангаш хоорайның чурттакчы чонунуң чагыы-биле, орукту калбартып турарывыс бо. Чон ТР-ниң Орук-транспорт яамызының сайтызынга, Кызыл хоорай чагыргазының социал четкиде блогунга, Улусчу фронтуга чагыгларны киирип болур. Чоннуң киирген чагыгларынга даянгаш, кайы орукка хамаарыштыр хөй дилеглер, хомудалдар киргенил, ол орукту мурнады кылып эгелээр. Хоорайның шупту оруктарын чаңгыс угда кылып эгелээри болдунмас. Ынчангаш бичиилеп кылып турары ол. Чогум орук септелгези планда көрдүнген боор. Чамдык оруктарны кылыр бетинде чоннуң бадылаашкынын база өөренип көөр.
Александр Абаринов, орук тудугжуларының даргазы:
– Май 20-де бо девискээрниң оруун кылып ажылдап эгеледивис. Эрги бордюрларны шуптузун ап кааптывыс. Орук кыдыынга турган чүүлдерни арыгладывыс. Чүге дээрге орукту оң болгаш солагай талазынче калбартыры планда көрдүнген. Бо чер боду черле кызыы чер-дир. Чаа бордюрларның 50 хуузу салдынган. Ам ийи хире неделя болза, ажылды доозуптар бис. Орукту кылырынга электри чагылары шаптыктап турар.
Айдың ОНДАР.
Ада ТЮЛЮШТУҢ тырттырган чуруктары.
«Шын» №41 2024 чылдың июнь 5
