Тываның Баштыңы Владислав Ховалыг Кызыл хоорайның чагырга чериниң удуртулгазы-биле найысылалдың хөгжүлдезиниң айтырыгларын сайгарып чугаалажыр ажылчын ужуражылганы эрттирген. Чазактың социал адырының төлээлери-биле катай удавас туттунуп эгелээр тус черниң мини-«Сириус” деп уруглар төвүнүң турар черин сайгарып чугаалашкан. Ам дээрезинде уруглар төвүнүң турар шөлү «Аныяк» деп Кызылдың өөредилге төвүнүң оран-савазы болур дижип турар.
Бо айтырыг талазы-биле төнчү шиитпирни хоорайның Төлээлекчилер хуралының депутаттары июнь айда болуп эртер сессияга хүлээп алыр-даа болза, “Аныяк” өөредилге төвүнүң оран-савазын хоорайның балансызындан республиканың Өөредилге яамызының өнчүзүнче дамчыдарының айтырыының документилер долдуруушкуну эгелей берген. Оран-саваның үндезин септелгезиниң төлевилел-дөзевилел документациязының белеткели база ону федералдыг үлегер-майыкка чыгап чоокшулаштырары дооступ турар.
Хөйге билдингир «Сириус» деп Сочиниң өөредилге төвүнүң дуржулгазын болгаш арга-хоргаларын ажыглаарының эргежок чугулазын Россияның Президентизи Владимир Путин чугаалаан турганын сагындырып каалы. Бөгүн хөй-хөй регионнарда мини-«Сириустар” тургустунган болгаш чедиишкинниг ажылдап турар. Ук төлевилелдиң боттанылгазынга Тыва 172 сая рубльди “Өөредилге” национал төлевилелдиң “Уруг бүрүзүнүң чедиишкини” федералдыг төлевилелдиң шугуму-биле алыр.
Депшилгениң сөөлгү дериг-херекселдери-биле дериттинген төп бо чылдың төнчүзүде ажылдап эгелээр. Ол сорунзаның төвү апаар, аңаа чыл дургузунда бүдүн республиканың уруглары эртемниң делегейинче шымныр аргалыг болурлар.
Амгы үеде “Аныяк” өөредилге төвүнде өөренип турар уруглар кичээнгей чок артпас. Олар өөредилге чорудулгазын амгы үеде туттунуп турар школага уламчылаар, ында база профугланыышкынның болгаш социализацияның амгы үениң байдалдары тургустунар.
Ол ышкаш республиканың Баштыңы Кызылдың Бай-Хаакская кудумчузунда, «Спутник», «Мөңгүн» болгаш Вавилин ээтпээнде туттунуп турар чаа школаларга ажылдаар кадрларның шилилгезин амдыгааштан эгелээрин мэрияга болгаш адыр аайы-биле албан черинге дааскан. Найысылалдың чаагайжыдылгазы болгаш тудуг-сууру теманың уланчызы кылдыр Вавилин ээтпээ микрорайоннуң келир үеде хөгжүлдезиниң дугайында чугаалашкан. Аңаа уруглар садын, фельдшер-акушер пунктузун тударындан аңгыда, микрорайоннуң инфраструктуразын хөгжүдериниң талазы-биле санал-оналдарны белеткеп кылгаш, киирер бис деп, мэрияның удуртулгазы аазаан.
Школалар тудуу-биле чергелештир бо чылын Кызылдың кудумчу-орук четкизинге улуг хемчээлдиг септелге ажылдары чоруттунар. Оон аңгыда, Кызылдың оруктарынга септелге ажылдары база планнаттынган. Чижээлээрге, “Айыыл чок шынарлыг оруктар” национал төлевилелдиң иштинге Колхозная кудумчузунда орук участогунуң улуг хемчээлдиг чаартылгазы, ол ышкаш Магистральная болгаш Каменистая кудумчуларында оруктарны үндезини-биле септеп-селиир. Оон аңгыда, республиканың Орук фондузунуң акша-хөреңгилери-биле солагай эриктиң дачалар ниитилелинден Сукпакта туттунуп турар школага чедир автоорукту асфальтылаар, “Мөңгүлек” аалчылар бажыңының мурнунда эртер черни болгаш үш орук белдирин калбартыр, ол ышкаш Интернациональная болгаш Полигонная кудумчуларында орук участоктарынга ажылдарны кылыр.
Ооң-биле чергелештир найысылал эргижирээн чуртталга фондузундан чоорту хосталып турар – ооң аңгы-аңгы микрорайоннарында эрги бажыңнарны бускан. Ук чорудулганы кичээнгейлиг хынаарын база дарый аштап-арыглаарын Владислав Ховалыг хоорай чагыргазындан дилээн. «Хосталган девискээрлерниң оон улам ажыглалының талазы-биле планнарны найысылалдың Чиңгине планынга, хоорайжыларның санал-оналынга дүүштүрер ужурлуг” — деп, ол айыткан.
/ А.ХЕРТЕК белеткээн.
"Шын" №25 2023 чылдың апрель 8
#Шынсолун #ТываныңЧазаанда #ТываныңБаштыңы #Тыва #Кызылхоорай #МиниСириус #Орук #Тудуг
