«Чурттаар оран-сава болгаш хоорай хүрээлеңи» национал төлевилелдиң «Чурттаарынга таарымчалыг хоорай хүрээлеңин хевирлээри» федералдыг төлевилелиниң иштинде объектилер чаагайжыдары дээш Бүгү-российжи онлайн-бадылаашкын доозулган.
Кызыл хоорайның чурттакчылары 2025 чылда чаагайжыдар девискээрлерин шилип алган. Бадылаашкынга 27 муң 408 хамааты киришкен. Төлевилелдиң сайтызынга, ол ышкаш бадылаашкыннар үезинде ажылдап турган волонтёрларның капсырылгазынга чурттуң 14 хардан өрү назылыг чурттакчы бүрүзү бодунуң үнүн берип болур турган.
Бадылаашкынның түңнелинде Тываның найысылалынга 3 девискээрни чаагайжыдар:
• Кызыл хоорайның эрик кыдыынга ТШО киржикчилеринге культурлуг комплекс (6096 үн);
• Дөгээ дааның бирги дөжүнде девискээрни чаагайжыдары (5262 үн);
• Солагай эриктиң дачаларының 5-ки доктаамының баарында хөй-ниити девискээрин чаагайжыдары (3325 үн).
Келир чылын база кижи бүрүзүнде бодунуң хоорайының азы суурунуң девискээрлерин чаартыры дээш үнүн бээр аргазы бар. Объектилер чаагайжыдары дээш бадылаашкыннар ам-даа 5 чыл уламчылаар..
«Шын» №37 2024 чылдың май 22
