Март 17-ниң хүнүнде найысылал Кызылга болгаш республиканың кожуун, сумуларынга Масленица неделязының сөөлгү хүнүн демдеглеп эрттирген. Кызылга И.Г. Сафьянов аттыг Орус культура төвүнүң девискээринге база Масленицаны байырлаан. Аңаа оюн-тоглаа, танцы-сам, ыры-хөгжүм куттулуп, угаан-медерел болгаш спортчу оюннарны база организастаан.
Масленица байырлалының эң-не чугула ёзу-чаңчылы – блиннер быжырары. Блиннер хүннүң болгаш частың моорлап келгенин илереткени ол. Ынчангаш байырлалда киржип келген Кызыл хоорайның уруглар садтары, чоокку кожууннардан келген аалчылар блиннерниң янзы-бүрү хевирлерин быжыргаш, орус чоннуң ажыл-агыйын, культуразын көргүскен булуңчугаштарны боттарының чогаадыкчы чоруу-биле делгеп, таныштырылгазын кылганнар.
Кызылдың 36 дугаар Найырал аттыг уруглар садының коллективи идепкейлии-биле байырлалга киржип чедип келгеннер. “Чылдың-на Масленицага идепкейлиг киржип турар бис. Чылдан чылче бир-ле солун, чаа чүүлдерни шенеп, чемнерни янзы-бүрү кылдыр чогаадып кылып турар бис. Чон күзелдии-биле садып ап турар. Биске ол дендии өөрүнчүг-дүр. Келир чылын оон-даа кызып киржир бис” – деп, уруглар садының удуртукчузу Елена Отук-оол чугаалаан.
Балгазынның агробүдүрүлге техникумунуң мастерлери студентилери-биле кады кылган аъш-чем аймаан, хады чочагайларындан, пөш тооруундан, киш-кулаа, чыжырганадан кылган вареньелер, сироптарын чылдың-на найысылалга Масленица болгаш өске-даа байырлалдарда делгеп салырлар. Бо удаа база боттарының бүдүрген чүүлдери-биле кызылчыларны өөрткен.
“Чоннуң хөйү-биле чыглып келгенин көөрге, часты сактып, манааны илдең-дир. Кышты үдеп, часты уткуп, изиг шай, амданныг, чаагай блинчиктер, концерт программазы ёзулуг-ла байырланчыг сеткил-хөөннү оттурду. Бөгүн мында Орус культура төвүнүң ансамбльдары болгаш “Октай” бараалгап чедип келген. Оон аңгыда, “Масленица дериг-херексели” деп мөөрей база болган” – деп, ТР-ниң Националдар херектериниң талазы-биле агентилелдиң директорунуң хүлээлгезин күүседип турар Анастасия Овчинникова чугаалаан.
Блиннер, оон аңгыда, үениң эргилдезин, чаа үениң болгаш частың келгенин илередир. Ол хүн масленица байырлалы хөй-ле чурттакчы чоннуң амыдыралынга өөрүшкүнү болгаш чылыгны эккелген.
Тываның Баштыңы Владислав Ховалыг республиканың чурттакчы чонунга Масленица байырлалын таварыштыр байырын чедирген: “Масленица байырлалын таварыштыр республиканың чурттакчы чонунга байырым чедирдим. Масленицаны Тывада кандыг-даа омак-сөөктүг кижилер байырлаарынга ынак”.
Масленица неделязының төнчүзүнде чоок кижилеринден өршээл дилээн соонда, масленицаның хоюткузун өрттедир. Ол часты уткуп турарының демдээ болур. Чурттакчыларның болгаш аалчыларның айыыл чок чоруун камгалаары-биле хоютку өрттедирин хоруп каан.
Чыжыргана СААЯ.
Буян ООРЖАКТЫҢ тырттырган чуруктары.
“Шын” №21 2024 чылдың март 20
![](https://sun4-19.userapi.com/impg/C5UsygpKV8yIQZ4_Sikfl49mPVW9pyQ67RozwQ/_5QYBAycmFg.jpg?size=807x537&quality=95&sign=c371e7477b77852c7aec77d7e8dec690&c_uniq_tag=PIc_jL_GWSGepN7bgNCVp8NqzIv5PnRE-Ja6ktwe0ZU&type=album)
![](https://sun4-18.userapi.com/impg/INQjM1Ao8CChNkY07phxcH9ttr1zly2acPFtUA/zWftEBrm4X4.jpg?size=807x745&quality=95&sign=5462b6c21bcaa29e207518b722cf62ab&c_uniq_tag=p-rNi-8joW6h_RJ8vFeIOKFEA09HqOkVF4smvoKl67M&type=album)
![](https://sun4-21.userapi.com/impg/rggSJxRV6FN_nlbpg3uuzzIH2DZCnRsGvvt5kg/E0UtOLnNNJw.jpg?size=807x615&quality=95&sign=e9a723e23b31132fe8b057e1a2c6820b&c_uniq_tag=WS6il5xXxNf5Lx17ORfR0Zvk11EMV01nxVzXbho9v-E&type=album)
![](https://sun4-20.userapi.com/impg/Z7d73gcRV3LqdZPG51aj7HJCqiywNm9-c2IvIA/vBQijgLn940.jpg?size=807x745&quality=95&sign=adca412ff3457a378c75b2832052ba09&c_uniq_tag=SfMQuTVUzRaBtNdWaejQNzRGfkJ2dH6QAc7OzoiozY4&type=album)
![](https://sun4-18.userapi.com/impg/4R2ThKOT01yvypFLc-lA6or72VSEK5Mi9IGjLw/iUrnoc5d5cE.jpg?size=807x776&quality=95&sign=018ee7579990539c5d8eaf684bbeee38&c_uniq_tag=oAxPVOiSNTXKcOofbAdRUL29ECrZvEUo2Rzr6-F9ABQ&type=album)
![](https://sun4-22.userapi.com/impg/0LAdRfqK8Xl1JkcHCCE7bSkBQuEsM3oaWXTgcA/05YNtqwl-rY.jpg?size=531x807&quality=95&sign=a2b5bf20ec8d9debf432cca72bb653e4&c_uniq_tag=N05jSSOVQxXcqGspjjui7Pc9Qi1zRjRPM7Z9kjkgh2Q&type=album)
![](https://sun4-21.userapi.com/impg/gb-b5ntgKOV-vCfnwk1HA_kjcm5awVhQb1Kjrg/rKyOjmGaTa4.jpg?size=807x481&quality=95&sign=456e144c4e91b09ca9aceaf11ebd7fd9&c_uniq_tag=gAOtUG9ENlKL6GdHGjgwEYvbeetjlWxgXQwfe_JTFOY&type=album)
![](https://sun4-21.userapi.com/impg/fSFSY_UKzxZB47ZfleVNHbwH1XlKHcXga05BEg/DUxuyZAoXlI.jpg?size=807x593&quality=95&sign=ac8a335c35cad941c1faa1fedc46f936&c_uniq_tag=mxWUcJn5bCnyt5UsS40yoQ1W837EUezpq_8QZcO2lwM&type=album)
![](https://sun4-20.userapi.com/impg/EoZ_b58GH-xmtmAxcCg9ict6TAOSiLnbfFh0YQ/Nbjxnm94dWg.jpg?size=807x698&quality=95&sign=c835b8d2c86e95b136e720f26eb86898&c_uniq_tag=BZsyEkWoZm9IwOR4BZvqzmxGjaV9tXuw8jUqbopg4nw&type=album)
![](https://sun4-17.userapi.com/impg/g55IZ43yOazuliHoMCRPMbDTX6qtaCatcdfnsg/qXa-4veP46Y.jpg?size=807x537&quality=95&sign=0a52f0d4cca088e26097ee81a0952ce4&c_uniq_tag=OBuYYIZ3fnzm4vPyE0PxWrLNTRlv6UtnB5Z3FqHh_m4&type=album)