2024 чылдың декабрь 29-тан 2025 чылдың январь 8-ке чедир Мөңгүн-Тайга кожуунда хүннүң-не өг-бүлелерге рейдилерни чорудуп турар. Ук хемчеглер назы четпээннерниң хайгаарал чок чоруун, хоойлу-дүрүм үрээшкиннерин, социал чедимче чок чорукту болдурбазынче угланган.
Амгы үеде 115 өг-бүлеге аалдап чедип, чаштарга Чаа чылдың белектерин үлеп, кышкы дыштанылга үезинде айыыл-халап болдурбазы-биле чүнү канчап болурунуң дугайында тайылбыр ажылдарны чоруткан. Ада-иелер мага-боттуң кезектериниң үжүй бээриниң, угарлыг газ-биле хорананы бээриниң дугайында, кемдээшкиннер болгаш орук озал-ондактарны баш удур болдурбазының талазы-биле ажыктыг сүмелерни алганнар.
Ажылчын үнүүшкүннерге профилактика талазы-биле 50 ажыг ажылдакчылар киржип турар. Оларга социал адырның, эмнелгениң, ном саңнарының ажылдакчылары, кожуун чагыргазының болгаш Мөген-Бүрен, Тоолайлыг сумуларының төлээлери хамааржыр.
Бо бүгү ажылды Мөңгүн-Тайга кожууннуң чагыргазының чанында Назы четпээннер херектериниң болгаш оларның эрге-ажыын камгалаар талазы-биле комиссия удуртуп турар. Шак мындыг рейдилер ажы-төлдүң кышкы дыштанылга үезинде айыыл чок чоруун хандырары-биле январь 8-ке чедир үргүлчүлээр.
