Тывада Рязань облазының күрүнениң Элээди көрүкчүлер театры биле С.А. Есенинниң Күрүнениң музей-заповедниги (камгалалдыг чери) “Есенин туру” каттышкан төлевилелин ийи хонук дургузунга чонга бараалгадыр дээш чедип келген. Ук төлевилелди культурлуг бот-идепкей деткээн Президент фондузунуң деткимчези-биле боттандырып турар. Бо төлевилелдиң программазында “Анна Снегина” деп шии биле “Силерниң таныырыңар Сергей Есенин” деп көжүп чоруур делгелге кирип турар
Дүүн культура сайыдының оралакчызы Сайдана Хертек келген аалчыларын журналистерге таныштырган. Рязаньның ЭКТ-ның уран чүүл удуртукчузу, ук төлевилелиң база удуртукчузу, режиссер Марина Есенина бир дугаарында сөс алгаш, Тыва оларның сеткилинге онзагайы-биле таарышканын демдеглээш, “Эрткен Ада-чурттуң Улуг дайынының үезинде болгаш амгы үеде-даа тыва чоннуң кайгамчык маадырлыг чоруу дээш оларга мөгейип, “Анна Снегина” деп шиини тураскаадып, тыва чонга көргүзер дээн бис”- деп, чугалаан.
Бо каттышкан төлевилели-биле чогаадыкчы бөлүк Якутяга, Бурятияга база чедип каапкан. Барган-на регионнарынга көрүкчүлерниң сонуургалы улуг болгаш, Есенинниң эрткен чүс чылда-ла өлүм чок шүлүктеринге илередип чорааны үзел-бодалы амгы үеде кажангызындан артык чонга чоок болуп турар дээрзин аалчылар чугаалап турганнар.
Тываның күрунениң Ойнаар-кыстар театрының директору Саян Монгуш Есенинниң шүлүүнден каш одуругну номчааш, “Театр биле музейниң каттышкан бо төлевилели дыка онза-дыр.Ооң шиизин көргүзүп тургаш, допчу-намдары, амыдыралындан чыгдынган ховар экспонаттарны көргүскен делгелгени аңгылаары болдунмас. Есенин дээрге чоннуң сагыш-сеткили-дир”- деп демдеглээн.
С.А. Есенинниң Күрүнениң музей-заповеднигиниң ажылдакчызы Наталья Лыгорева бо төлевилелге киржиринге музейден беш хааржак ишти делгелгеге салыр экспонаттарны чыып белеткээнин дыңнаткан. Оларның аразында Сергей Есенинниң хууда ажыглап чораан чүүлдери, холунуң үжүүн арттырган бижимелдери болгаш өске-даа экспонаттар бар. Ол бүгүнү республиканың чурттакчылары октябрь 25, 26 хүннеринде Кызылдың Улусчу чогаадылга бажыңынга көрүп болур. Бо төлевилелдиң онзагай чүүлү - шии мурнунда көрүкчүлер делгелгеден улуг орус шүлүкчүнүң амыдыралының дугайында болгаш ооң эдилеп чорааны чүүлдери-биле көрүп таныжар аргалыг болуру.
Сайдана Хертек сөөлгү үеде “Театр+” деп формат театр уран чүүлүнде нептереңгей апарганын демдеглээн. Ол ышкаш ырактан келген аалчыларның шиизин В. Көк-оол аттыг Национал театрның сценазынга көргүзери болдунмайн барганының чылдагааны - ында улуг септелге ажылы чоруттунуп турар, ынчангаш Улусчу чогаадылга бажыңының сценазынга көргүзер болган деп ол дыңнаткан. А Рязаньдан аалчыларга сценаның улуг-бичези роль ойнавайн турар, эң-не кол чүүл - шииниң утказын көрүкчүлерге дамчыдары деп, Марина Есенина чугаалаан.
Шииниң тургузукчузу режиссерунуң фамилиязының улуг шүлүкчүнүү-биле дөмей болганын журналистер эскерип, ооң дорт салгалы эвес бе дээн айтырыгны база салган. Ол харыызынга, “Дөмей дээрден өске, бичии-даа чоок төрел тыртар чылдагаан ында чок”- деп харыылаан.
Допчу намдарынга үндезилээш, Есенинниң бижээн шиизинче “Пушкин картазы”-биле билеттерни Тываның Национал театрының кассазындан садып ап болур. (Бо домакты эскерип көөр болза, эрткен чүс чылдың делегей чергелиг улуг шүлүкчүлери Есенин биле Пушкин бот-боттарын деткижип-ле чыткан ышкаш... Автор.)
Чыглып келген журналистерге В. Көк-оол аттыг Национал хөгжүм-шии театрының көрүкчүлер-биле ажыл чорудар килдизиниң эргелекчизи Ай-Чек Казырыкпай чаарттынган театр көрүкчүлеринге эжиин ноябрь 1-де ажыдар дээнин дыңнаткан.
К. Монгуш
Чуруктар Буяна Ооржактыы
