Неделяның эң-не кол болуушкуну — арга-арыг өрттери. Неделя дургузунда республиканың девискээринге 32 арга-арыг өрттери бүрүткеттинген.
Август 23-түң көргүзүү-биле 851 га шөлде 6 өрттү — Тес-Хем, Кызыл, Тожу кожууннарның база Чадаананың арга-арыгларында өрттерни өжүрген.
Таңды кожуунда өрт узуткаар талазы-биле ийи штаб тургустунган.
«Бе-200» амфибия самолет Тывага ужуп келгеш, Таңдының өрттерин өжүрүп турар.
Өрт халавын узуткаар ажылдарда 505 кижи база 53 техника хаара туттунган. Тываның өртчүлери-биле катай Красноярск крайның, Иркутск, Томск областарның, Хакас Республиканың авиа арга-арыг камгалалының 140 ажылдакчызы киржип турар.
Таңдының арга-арыг өрттерин узуткаар ажылдарга эки турачы бригадалар болгаш ОБЯ-ның күштери дузалажып турар.
Бүгү делегей чергелиг «Новая волна» мөөрейге Денберел Ооржак Россияны төлээлээр дээрзин ТР-ниң Культура яамызы дыңнаткан.
Тывага «Мээң спортчу өг-бүлем» деп өг-бүлелер спартакиадазы болган.
Тыва спортчу Торепчи Донгак Бангкокка болган ONE Championship лигага япон мөгени октааш, тиилекчи болган.
ТР-ниң Дээди Хуралынга Тываның Хөй-ниити палатазы биле российжи партияларның регионалдыг салбырлары кады ажылдажылганың керээзин чарган.
Тываның Баштыңы Владислав Ховалыг Улуг-Хем кожуунче ажыл-агыйжы үнүүшкүннү кылган. Кожууннуң сумуларынга чедип, чурттакчы чон-биле ужуражылгаларны эрттирген.
Ол ышкаш Тываның Баштыңы Чаа-Хөл кожууннуң кышка белеткелин хынаан. Чаа-Хөл суурнуң чылыдылга четкизиниң план езугаар септелгези доозулган.
Август 22-де республиканың чедери берге болгаш ыраккы черлеринге ТР-ниң Дээди Хуралының (парламентизиниң) дөрткү чыыжының депутаттарының баш бурунгаар соңгулдалары эгелээн.
Август 22-де Россияның Күрүне тугунуң хүнүнде Тываның Чазак бажыңының баарынга Россияның болгаш Тываның күрүне туктарын байырлыг байдалга көдүрткен.
ТР-ниң Дээди Хуралынга «ТШО-га деткимчези дээш» деп медальдарны байырлыг байдалга тывыскан. Шаңнатканнар аразында «Ада-чурт камгалалы» фондунуң салбырының ажылдакчылары, 55-ки гвардейжи мото-адыгжы (даг) бригаданың база Төп шериг округунуң 41659-ку шериг кезээниң шериг албанныглары бар.
Август 23-те Тыва Республиканың башкыларының Август чөвүлел хуралы болган. Аңаа эрткен өөредилге чылының түңнелдерин үндүрбүшаан, чаа өөредилге чылының сорулгаларын болгаш хөгжүлдениң угланыышкыннарын сайгарып чугаалашкан.
РФ-тиң Күрүне тугунуң хүнүнде Кызылга улуг автопробег болган. Ону «Чаңгыс демниг Россия» партиязының идепкейжилери «Кочевники Азии» мотоклуб-биле катай организастаан.
А. СОЯН белеткээн.
“Шын” №64 2024 чылдың август 24
