Чаңгыс аай күрүне шылгалдаларының түңнелдери билдинген. Бо чылын алдын медальга 107, а мөңгүн медальга 77 доозукчу төлептиг болган. Тываның Баштыңы Владислав Ховалыг 100 баллдыг доозукчулар саны өзүп турарын демдеглээш, оолдар, уругларга чедиишкиннерни база мергежилин болгаш эртем чедип алыр өөредилге черин шын шилип алырын күзээн.
Тывада «Тени ушедших Тулку» деп чаа уран-чечен фильмни тырттырып эгелээн. Ону Москваның кино школаларының салым-чаяанныг сургуулдары болгаш режиссёр Виталий Петровтуң киржилгези-биле «Улан» кинокомпания боттандырып эгелээн.
Амгы үениң чидиг айтырыгларын көргүскен кинода сураглыг артистер Виктор Наксыл, Галина Мунзук база Надежда Наксыл, ол ышкаш аныяк актёрлар Вероника Саая, Чылгычы Даваа база Виктория Монгуш ойнап турар. Кинону Чаа-Хөл кожууннуң чурумалдыг чараш черлеринде тырттырып турар.
Июль 12-де полицияның болгаш кызыгаар албанының ажылдакчылары Эрзин кожуунда Төре-Хөлге каттышкан рейдини чоруткан. Хыналда үезинде 372 кижиниң чүгле 21-де эрттирилге документизи бары илерээн. Камгалалдыг черже баарда, чогуур эрттирилгени кылдырары албан дээрзин заповедниктиң ажылдакчылары сагындырып турар. Ону күүсетпээн таварылгада административтиг хемчеглерге онаажып болур база 3000 рубльге торгаадыр.
Эрткен дыштаныр хүннерде «Тайга” станциязынга аныяк хаакчы Кежик Чыртак-Уругнуң 18 харлаанынга тураскааткан республика чергелиг дугуйлуг хаак маргылдаазы болуп эрткен.
18 харга чедир оолдар аразынга бирги черни Эдуард Лахов, ийиги черни Амир Монгуш, үшкүзүн Сайынбек Сарыглар алган, кыс уруглар аразынга Алдын-Сай Донгак биле Кристина Куулар бирги-ийиги черлерни үлешкен. 12 харга чедир оолдар аразынга бирги черге Александр Куулар төлептиг болган.
А. СОЯН белеткээн.
Чуруктарны интернеттен хоолгалаан.
“Шын” №27 2025 чылдың июль 17
