Некролог

Тыва Республиканың улустуң башкызы Тамара Григорьевна Ондар чырык өртемчейден чарлып чорутканын ханы кажыыдал-биле дыңнадып тур.

Тамара Григорьевна бүгү назынын башкылаашкынга бараалгаткан. 1971 чылдан эгелеп Кызылдың 2 дугаар школазынга биология болгаш химия башкызы кылдыр күш-ажылчы намдарын эгелээн. Кызылдың национал школазын 20 ажыг чыл дургузунда удуртуп келген. Тамара Григорьевнаның дугайында ханы билиглиг, эртемге бердинген башкы, билдилиг удуртукчу, бодунуң арга-дуржулгазын болгаш билиглерин аныяк башкыларга болгаш коллегаларынга харам чокка дамчыдып берип чораан деп кады ажылдап чораан эш-өөрү чылыы-биле сактып турар.

Ол башкылап турар үезинде республиканың алдар-аттыг эмчилер, башкылар, эртемденнер, эртем кандидаттарын болгаш докторларын өөредип доостурган.

Тамара Григорьевна өзүп олурар аныяк салгалды өөредир болгаш кижизидеринге киирген үлүг-хуузу дээш хөй санныг шаңнал-макталдар-биле шаңнаткан. Ол ышкаш “Улус өөредилгезиниң тергиини”, “Тыва Республиканың өөредилгезиниң алдарлыг ажылдакчызы”, “Тыва Республиканың улустуң башкызы” бедик аттарга төлептиг болган.

Тыва Республиканың Өөредилге яамызы республиканың бүгү башкылар ниитилелиниң өмүнээзинден ооң чоок улузунга, ажы-төлүнге, дөргүл-төрелинге ханы кажыыдалды илередип тур.

Үндүрер хүнү 2023 чылдың март 31-де 10.30 шакта Кызыл хоорайның Монгуш Сат кудумчузу, 9 кв. 6 (Студгородок 2).