Күрүне Думазының депутады Айдың Сарыглар бюджет орулгаларының өскенин база чурттакчы чоннуң мурнунга хүлээлгелерниң күүсеттингенин эки барымдаа кылдыр демдеглээн:
«Иштики политикавыс база тускай шериг операциязының үезинде чурттап турарывыс-биле холбашкан бергедээшкиннер турза-даа, республика чурт-биле кады социал хүлээлгелер планын долузу-биле күүсеткен. Тываның 2024 чылда бюджеди долузу-биле күүсеттинген, орулгалар 67 млрд 818 сая – ооң мурнунда үеге деңнээрге, 12 хуу өскен. Тываның Чазааның үре-түңнелдиг ажылын демдеглеп, соңгукчуларның өмүнээзинден регионнуң хөгжүлдези дээш моон-даа соңгаар чедиишкинниг ажылдаарын күзедим».
Дээди Хуралдың оралакчы даргазы Андрей Листков 2024 чылдың бюджеди «быжыг улуг дөртке» күүсеттинген деп демдеглээн:
«Республика шапкын темп-биле хөгжүп турар – тудуглар өзүп, иштики орулгалар көвүдеп, улуг компаниялар Тываже кирип турар. Чедир кылыр ажылдар бар, ынчалза-даа эки талалар оон хөй-дүр. Темпини алган соонда, ону салбас херек. Боттандырар чүүлдер-ле хөй, а ажылчын холдарның чедишпези – улуг айтырыг. Шупту адырларда специалистер чедишпес. Хөй болгаш эки ажылдаар дээш, эгелээн ажылды уламчылаар. Республиканың болгаш кижи бүрүзүнүң чаагай чоруунче чаңгыс шын орук ол».
ОНФ-тиң Тывада регионалдыг күүсекчи комитединиң даргазы Саима Далчин Улусчу фронт биле республика Чазааның тускай шериг операциязын деткиир талазы-биле кады ажылын үнелээн:
«Шынап-ла, планнаттынган ажылдар хөй. Ынчалза-даа деткимче бар, ол уламчылап турар. Республика дотациялыг-даа болза, хөйнү кылган, деткимчени ам-даа уламчылаар. Улусчу фронт бистиң шериглеривисти болгаш хостаан девискээрлерниң хамааты чонун деткиир гуманитарлыг дуза чыылдазын чорудуп турар болганда, республиканың Чазаа-биле кады ажылдажылганы онза үнелээр-дир бис. Ол ажылывыс ам-даа уламчылаарынга идегээр бис».
Хөй-ниити дыңнаашкыннарының соонда 2024 чылдың бюджет күүселдезиниң дугайында отчетту Тываның парламент сайгарылгазынче киирер. Депутаттарның үнелелинден алырга, Дээди Хуралга ону бадылаарынга бергедээшкиннер турбас. Дыңнаашкыннар киржикчилериниң киирген санал-оналдарын, сагындырыгларын болгаш күзелдерин хоойлужудулга тургузукчулары төнчү шиитпиринге киирип, а республиканың Чазаа дараазында саң-хөө планын тургузарда, кичээнгейге алыр.
ТР-ниң Чазааның парлалга албаны.
«Шын» №22 2025 чылдың июнь 12