Июнь 5 – Россияда экологтуӊ хүнү
Россияныӊ экологтары Бүгү делегейниӊ бойдус камгалаар хүнүнде «Ногаан ажыл-херек марафону» деп масштабтыг хемчегни планнаан. Чурттуң 89 регионунуӊ чурттакчылары июнь 3-тен тура экологтуг акцияларны эрттирип эгелээн.
Кызыл хоорай чагыргазы «Хоорайывысты арыг-силиг тудаал» деп экологтуг акцияны чарлаан.
Найысылалдыӊ Калинин кудумчузунда «Алдарныӊ аллеязы» маадырларныӊ тураскаалдарыныӊ девискэээринде бокту аштап-арыглаарынга, «Мээӊ найысылалым» волонтерлар организациязы, Тываныӊ Аныяктар херектериниӊ талазы-биле агентилели киришкен.
«Экосистема» Бүгү-российжи экологтуг хөй-ниити шимчээшкини бойдус камгалаар организацияларны болгаш экологтуг төлевилелдерни каттыштырган. Бойдусту камнап, хумагалаар ажыл-херектерни Неваныӊ экология хуралынга сайгарып чугаалажып турар.
«Чуртка улуг арыглаашкын кылырыныӊ дугайында үргүлчү чугаалап турар-дыр бис. Шупту демнежип алгаш, овааланган бокту аштап-арыглап, ыяштарны тарып, хемнерниӊ, хөлдерниӊ, кара сугларныӊ эриктерин, бажыӊывыстыӊ, ажылдаар черивистиӊ чанында боктарны аштаалыӊар. Экологтуг акцияларга киржиилиӊер. Заповедниктерге, дириг амытаннарныӊ питомниктеринге дузалажыылыӊар. Арыг агаарлыг бойдус чурумалдыг черлерге барып дыштаныр экологгуг кокпа оруктарны чараштап кылыылыӊар. Шак ындыг улуг арыглаашкын дээрге он-он, чүс-чүс, муӊ-муӊ хемчеглерден, хуу кижилерниӊ эгелекчи саналдарындан, коллективтерниӊ демниг киржиринден хамааржыр. Экосистема дээрге ол-дур» — деп, Россияныӊ Аныяктар херектеринин агентилелиниӊ талазы-биле Федералдыг сүмелекчи Олег Макаров чугаалаан.
«Ногаан ажыл-херек марафону» деп масштабтыг хемчегниӊ шугуму-биле экологтуг акцияларны июнь 12-ге чедир уламчылаар.
Р. ДЕМЧИК белеткээн.
