Мөрен суурнуң ном саңының ажылдакчыларының чогаадыкчы, тывынгырын, ажылынга бердингенин көрүп тур мен. Олар школачыларга болгаш хоочуннарга янзы-бүрү солун хемчеглерни организастап турарлар.
Суурнуң школачылары күскү дыштанылгазында ном саңынга барып, чаа номнарны бижидип ап, номчулга залынга солун-сеткүүл, номнар номчуурундан аңгыда, телевизорга мультфильмнерни-даа көөр, оюннар-даа ойнаарлар. Бичии уругларның назынынга дүүштүр солун номнарны номчааш, утказын тайылбырлап бээрлер. Бо бүгүнү библиотеканың ажылдакчылары эргелекчизи Долита Ликтановнаның удуртулгазы-биле организастап турар.
Школачылардан аңгыда, ном саңының доктаамал бижикчилери улуг назылыг хоочуннарга база солун хемчеглерни удаа-дараа эрттирип турар.
Улуг-даа, бичии-даа кижилерге ном саңының ажыы улуг деп көөр-дүр мен. Ылаңгыя бо үеде чаш ажы-төл, харын-даа улуг кижилер безин, телефоннардан адырылбайн баар болгай. Ажы-төлдү ном номчуурунга чаңчыктырып, өөредиглиг оюн-тоглаа эрттирери ажыктыг болбайн канчаар. А улуг назылыглар солун-сеткүүл, номнар номчуурунга черле ынак. Ном саңында оларның номчуксаары солун-сеткүүлдер, номнар шупту бар.
Ынчангаш Мөрен суурнуң библиотеказының ажылдакчылары кыстарга буянныг ажыл-ишти кылып чорууру дээш өөрүп четтиргенивисти илереттивис.
Чечекмаа САДИ,
ТР-ниң алдарлыг ажылчыны.
Мөрен суур.
“Шын” №85 2024 чылдың ноябрь 6