Эрткен дыштаныр хүннерде Кызылдың улуг назылыгларның бажың-интернадынга чогаалдарга болгаш номнарга ынактарның байырлалы болган. «Номнарга тураскаадып…» деп аттыг биче шиилер мөөрейинге республиканың бажың-интернаттарының чогаадыкчы салым-чаяанныг «мөңгүн назылыглары» киришкен.
Кызылдың бажың-интернадының коллективиниң организастааны солун мөөрейи көрүкчүлерге уттундурбас солун сактыышкыннарны арттырган. Хөйге билдингир номнарның маадырлары сцена кырынга диригжип, көрүкчүлерниң улуг сонуургалын оттурган.
Мөөрейге Кызылдың, Сукпактың, Бүренниң, Дүргенниң база Чадаана хоорайның бажың-интернаттарының талантылыг чурттакчылары киришкен. Киржикчи бүрүзү онзагай чогаалдарның утказын көргүзүп, артисчи уран аргаларын бараалгаткан. Көрүкчүлер артистерниң күүселдезин адыш часкаашкыннары-биле уткуп хүлээп, магадал-биле көргеннер.
«Дыка чылыг, чырык болгаш кайгамчык солун болду. Номнар кижилерни канчаар сорук киириптерин, демнештириптерин база өөрүшкүнү сөңнээрин көрдүвүс. Күүселделеринге киржикчи бүрүзү бүгү сагыш-сеткили-биле киришти» — деп, жюри кежигүннери демдеглээн.
«Номнарга тураскаадып…» деп бичии шиилер мөөрейиниң түңнелинде тиилекчилер илерээн. Чадаананың бажың-интернадының салым-чаяанныг киржикчилери «Репа» деп орус чоннуң тоолун көргүскеш, бирги черге төлептиг болганнар. Ийиги черни С. Бюрбюнуң «Кызыл кош» деп чогаалынга үндезилээн шиизи дээш Кызылдың бажың-интернады алган. Сукпактың бажың-интернадының төлээзи В. Высоцкийниң «Он не вернулся с боя» деп монологун күүсеткеш, үшкү черге шылгараан. Ол ышкаш эң-не тергиин эр, кыс рольдар күүседикчилерин база «Эң-не мерген угаанныг актёр» деп номинацияларны база илереткен. Тиилекчилерни дипломнар болгаш өртектиг белектер-биле шаңнап-мактаан.
Арынны А. СОЯН белеткээн.
Чуруктарны ТР-ниң Күш-ажыл болгаш социал политика яамызындан алган.
«Шын» №41 2025 чылдың октябрь 23
