Новосибирскиниң күрүнениң уран чурулга музейинде «Сибирьде импрессионистер» делгелге байырлыы-биле ажыттынган. Россия Федерациязының Президентизиниң Сибирь федералдыг округта бүрүн эргелиг төлээзи Анатолий Серышевтиң база Россияның Культура яамызының деткимчези-биле бо улуг хемчээлдиг культура төлевилелин боттандырган.
А.С. Пушкин аттыг күрүнениң уран чүүл музейиниң коллекциязында импрессионист мастерлер — Камиль Писсарро, Альфред Сислей, Поль Сезанн, Гюстав Курбе, Анри Матисс, Альбер Марке болгаш өске-даа шылгараңгай чурукчуларның онзагай чуруктары Сибирьниң хоорайларынга элээн каш айлар дургузунда делгеттинер. Делгелге ажылын эрткен чылдың декабрьда Омск хоорайга «Сибирьде импрессионистер» эгелээш, ам Новосибирск хоорайда доктааган.
«Импрессионизмниң төөгүзү», «Импрессионизм болгаш ооң үези», «Импрессионизмниң кичээлдери» деп үш темалыг бөлүктерден делгелге тургустунган. Бөлүк бүрүзү ооң үндезинин салган уран чурулганың тургузуушкунун, сайзыралының үе-чадазын болгаш делегей уран чүүлүнге ооң салдарын таныштырар.
Организакчыларның чугаазы-биле алырга, Пушкин аттыг күрүне музейиниң мындыг улуг чуруктар чыындызы бир дугаар узун хуусаалыг аян-чорукче чоруп турары – бо делгелгениң онзагайы.
«Мындыг улуг төлевилелди боттандырары нарын-даа болза, ону кылыр күзел күштүг болган. Ол ышкаш шупту талалардан – Россия Федерациязының Культура яамызының, бүрүн эргелиг төлээ Анатолий Анатольевич Серышевтиң бодундан, Пушкин аттыг музейниң база регионалдыг музейлер удуртулгазындан быжыг тура-сорук база шиитпир кол черни ойнаан. 2026 чылдың дургузунда Сибирьниң алды хоорайы импрессионизмниң ховар ажылдарын көөр кайгамчык арганы алган» - деп, Россия Федерациязының Президентизиниң Сибирь федералдыг округта бүрүн эргелиг төлээзиниң оралакчызы Олег Денисенко демдеглээн. Байырлыг ажыдыышкынның аалчыларынга ол Анатолий Серышевтиң өмүнээзинден байырны чедирген.
Бо болуушкун Новосибирск облазының культурлуг амыдыралынга канчаар-даа аажок улуг ужур-уткалыг болур дээрзинге организакчылар бүзүрелдиг. Сөөлгү чылдарда Новосибирскиниң күрүнениң уран чурулга музейи тускай делгелге төлевилелдерин боттандырып турар. Новосибирскиниң чурттакчыларынга болгаш аалчыларынга Россияның билдингир чурукчуларының, ооң иштинде Василий Суриковтуң, Архип Куинджиниң, Валентин Серовтуң ажылдары-биле таныштырган.
«Сибирьде импрессионистер» деп делгелге Новосибирск хоорайга апрель 12-ге чедир делгеттинген. Ооң соонда шылгараңгай мастерлерниң чуруктары Кемерово, Абакан, Красноярск, Иркутск хоорайларже аъттаныптар.