Ноябрь 1-де Орус культура төвүнге юбилейлиг Улуг этнографтыг диктант бижилгези болган.
“Улуг этнографтыг диктант” деп X юбилейлиг чырыдыышкын акциязы чүгле Россияга эвес, даштыкы чурттарга база эрткен.
Ооң кол утказы – чаңчылчаан үнелелдерни нептередири, шынныг төөгүнү кадагалаары болгаш хөй омак-сөөктүг Россияның демниг чоннарының эп-каттыштырылгазын күштелдирери-биле хамааты туружун быжыглаары.
Диктант бижиириниң мурнунда, “Чурттап чор мен. Ынак мен. Чоргаарланыр мен” деп улуг шуулганның боттандырылгазының III чадазын түңнээри-биле ооң организакчыла- ры – Федералдыг националдар херектериниң талазы-биле ТР-де агентилелдиң, Россияның чоннарының Ассамблеязы болгаш И.Г. Сафьянов аттыг орус культура төвүнүң ажылдакчылары Тываның сайзыралынга улуг рольду ойнаан хөй-ниитижи, эртемден Иннокентий Сафьяновтуң тураскаалынга чечектер салыр ёзулалдан эгелээн.
Аңаа республикада бактаап турар аңгы-аңгы национал диаспоралар болгаш хөй-ниити организацияларының төлээлери, депутаттар, удуртукчулар киришкен. Оон аңгыда үш чадалыг эрткен улуг шуулганның тиилекчилеринге шаңналдар тыпсыр кезээ солун концерт номерлери-биле байырлыг байдалга эрткенин чыылганнар демдеглээн.
Шуулганны “Россияның чоннарының Ассамблеязы” хөй-ниити организацияның грант деткимчези-биле, ТР-ниң Чазааның, Федералдыг националдар херектериниң талазы-биле ТР-де агентилелиниң деткимчези боттандырганын сагындыраал.
Ол хүн Орус культура төвүнге болган хемчегниң байырлыг кезээ доозулганда, чыылганнар баш бурунгаар белеткээн олуттарны ээлеп, диктант бижилгезинге киришкен.
Бо чылгы Улуг этнографтыг диктантыны Ада-чурт камгалакчызының чылынга тураскаадып эрттирип турар болганда, ооң айтырыгларынга немей ТШО киржикчилери боттарының айтырыгларын база салып турган.
Бо чылгы этнографтыг диктантыны республиканың бүгү кожууннарында, суурларында ном саңнарында, көдээ культура бажыңнарында организастап эрттирип турар. Кызылда Орус культура төвү диктант бижиир кол шөлчүгеш болуп турар. Ниитизи-биле 65 оффлайн-шөлчүгештер ноябрь 1-ден 8-ке чедир ажылдаар. Оон аңгыда бо чылгы диктант бижидилгезиниң үезинде үш удаа онлайн киирилде – ТШО киржикчилериниң айтырыгларын экрандан дыңнааш, диктант бижикчилери аңаа бижимел харыыны база немээр. Диктантының түңнелдерин декабрь 13-те үндүрер. Диктант бижээн киржикчилер сертификаттарны электроннуг хевирге ап болур – деп, И.Г. Сафьянов аттыг орус культура төвүнүң директору В.Н. Лапшакова дыңнаткан.
Бистиң корр.
Чурукту интернеттен алган.
“Шын” №43 2025 чылдың ноябрь 6
