Тываның эрге-чагыргалары ОШАЧКИ-ниң доктаамал доскуулдарының ажылын катап диргизип турар. Республиканың Баштыңы Владислав Ховалыгның дыңнатканы-биле алырга, Тываның иштики херектер сайыды Сергей Кондрашов-биле чоокку үеде Тес-Хем, Чаа-Хөл болгаш Чөөн-Хемчик кожууннарга доктаамал доскуулдарны катап тургузарының дугайында дугурушканнар. Май айның төнчүзүнде-ле ээн кагдынган оран-саваларны таарымчалыг байдалче киирер болгаш ооң соонда оларның ажылдаар чурумун ИХЯ-ның удуртулгазы-биле тодарадыр.
Бөгүн орук-транспорт озал-ондааның болуп турар боттуг чылдагааннары оруктарның шынарының багай болуп турарында-даа, оларның байдалын хайгаарап турар техниканың чедишпезинде-даа эвес, а машина-балгаттың санының көвүдээни, шимчээшкинниң хайымы болур дээрзинге губернатор бүзүрелдиг. Сөөлгү үш чылдың дургузунда Тывада машина-чычаанның саны 3,2 муң ажыгга көвүдээн. “Башкарылганың культуразын бедидер дээш, кызып турар бис. Бо айтырыгга баш бурунгааргы профилактика кезээде-ле чугула рольду ойнап турар” – деп, ТР-ниң Баштыңы медеглээн.
ОШАЧКИ-ниң доктаамал доскуулдарының ажылын катап диргизериниң талазы-биле ажылдарны Тыва Республиканы корумчударының талазы-биле ведомстволар аразында комплекстиг планның хемчеглериниң иштинде чорудуп турар. Бо чылдың март айның эгезинде Тываның Баштыңы Владислав Ховалыг, республика прокуратуразының, Россияның Истелге комитединиң Тыва Республика талазы-биле Истелге эргелелиниң, Тыва Республика талазы-биле ИХЯ-ның, Кеземче күүселдезиниң федералдыг албанының эргелелиниң удуртулгазы ук планга ат салганнар.
Милиция адырының өйлеп-таарыштырылгазын, кызырылдазын чорутканының түңнелинде, Тывага ОШАЧКИ-ниң чамдык доктаамал доскуулдары октаттынган турган. Эгезинде-ле регион чоруттунуп турган чаартылгаларга көңгүс удур болуп, тус черниң бот-тускайлаңынга сылдаглап турган. Ооң соондагы прогнозтуң көргүскени-биле алырга, орук-транспорт албанының доктаамал доскуулдарын узуткааны-биле холбаштыр республиканың оруктарынга хөй кижи когаралдыг озал-ондактарның саны көвүдээн, чолаачыларның сагылга-чуруму кудулаан.
/ А. ХЕРТЕК белеткээн.
#Шынсолун #Тыва #ТываныңЧазаа #ТываныңБаштыңы #ОШАЧКИ #ИХЯ
