Дүүн, июнь 9-та, оперативтиг дежурный телефону -112-же Чөөн-Хемчиктиң чурттакчызы Кызыл хоорайның Шагонарская кудумчузунуң чоогунга 11 харлыг оглу чиде бергенин дыңнаткан.
Медээ алган соонда, республиканың тускай эдилгелиг школаларының бирээзиниң кижизиттирикчизи оолду дилээри-биле камгалакчылар бөлүү дораан келген.
Бичии дуңмазы-биле Улуг-Хем кыдыынга ойнап олурда, дуңмазы ойнаарактар ап алыр дээш дедир чоруй баргаш, кээрге, акызы турган черинде чок болган. Дуңмазы чанып келгеш, авазынга чугаалаарга, ол девидеп, кадыының байдалы кызыгаарлыг арга-шинектиг оглу хемче кире берип болур дээш, дораан камгалал албанынче долгапкан.
Дарый дилээшкинниң түңнелинде, камгалакчы Саян Ооржак читкен оолду хем эриинге олурда, тып алган. Оол дыка корткан болган. Чүге дээрге, ону черлик ыттар долгандыр үглеп алган турган. Ындыг-даа болза, ону ооң ыды черлик ыттардан камгалап, оолче чагдатпайн турганы аас-кежик болган. Бо байдалда ыттың бичии ээзингге бердингенин, ону айыылдан камгалаанын кайгамчыктыг онза таварылга деп камгалакчылар демдеглээн.
ТР-ниң “Аварийлиг-камгалал албаны”-ның медээзи-биле
