2022 чылдың июль 19-туң байдалы-биле алырга, Мөңгүн-Тайга кожууннуң социал албан черлеринче хөмүр сөөртүлгези чогуур чурум ёзугаар чоруп турар дээрзин кожууннуң чагырга даргазының амыдырал хандырылгазының талазы-биле оралакчызы Ужар-оол Ондар дыңнаткан.
Бо хүнде 383,56 тонна хөмүрнү чедирген. План ёзугаар июль айның төнчүзүнге чедир 1200 тонна хире хөмүрнү социал албан черлеринче сөөртүр. Ол дээрге ажылдың 28,5 хуузу болур. Август айда 2200 тоннаны чедирер. Ынчан чылдың планы 80,6 хуу күүсеттинген болур. Ниитизи-биле кожууннуң албан черлеринге бүдүн одалга сезонунда 4217,50 тонна хөмүр хереглеттинер. Ук ажылды 2022 чылдың сентябрь 20-ге чедир доозарын планнап турар.
Ол ышкаш кожуунда одалга склады база ажылдап турар. Амгы үеде одалга сезону төнгени-биле, ында хөмүр чок. Сентябрь 1-де кожууннуң девискээринге одалга сезону эгелээрге, ук складче хөмүрнү сөөртүп эгелээр.
Чыжыргана СААЯ белеткээн.
Чурукту интернеттен алган.