Өвүр кожуунда
Республиканың кожууннарында одалга сезонунга белеткел ажылдары чоруп турар. Өвүр кожууннуң чагырга даргазының амыдырал хандырылгазының талазы-биле оралакчызы Вероника Седен-оолдуң дыңнадып турары-биле алырга, 2022 чылда Өвүр кожууннуң чедери берге суурларының албан черлеринге хөмүр-даш садарынга болгаш чедиреринге 9696,71 муң рубль көрдүнген. Ооң иштинде 2009 тонна хөмүр садарынга 6241,64 муң, а чедиреринге 3455,07 муң рубль бар.
2022 чылдың июль 19-туң байдалы-биле алырга, Өвүр кожууннуң девискээринде чедери берге суурларның албан черлеринге хөмүрнү саткаш, чедиреринге 3 393,8 муң рубль шилчип келген. Ук акшаландырыышкын-биле кожууннуң социал адыр объектилеринге 2022 чылда тургустунган чурум ёзугаар хөмүрнү чедирген. А бюджет албан черлеринче чурум ёзугаар июль 18-тен тура хөмүрнү сөөртүп эгелээн.
6 школага, 8 уруглар садынга болгаш 2 немелде өөредилге черинге септелгени чоруткан. Өөредилге черлериниң 55 хуузу одалга сезонунга белен. Кабинеттер септелгези доозулган, коридорлар, херимнер, фасадтар будуур болгаш өске-даа даштыкы ажылдар ам-даа чоруп турар.
Уруглар садтарының 60 хуузу белен, чүгле даштыкы ажылдары арткан. Ол чүл дээрге уруглар ойнаар шөлчүгештерни будууру, уругларның ойнаар элезинин солууру, аяк-сава, горшоктарны, сандайларны, кабинкаларны демдеглээри хамааржыр.
Кожууннуң өөредилге албан черлеринге бүдүн одалга сезонунуң дургузунда 1438 тонна хөмүр-даш хереглеттинер.
Амгы үеде ук адырда 6 культура албан чери, 2 уругларның уран чүүл школазы, 1 төп библиотека системазы (ооң иштинде суурларда 6 ном саңы бар) одалга сезонунуң эгелээринге чедир 70 хуу белен.
Кышкы үеге белеткенири-биле, Өвүр кожууннуң культура албан черлериниң оран-савазының косметиктиг септелгезин дооскан. Ук адырга одалга сезонунуң дургузунда 457 тонна хөмүр хереглеттинер.
Кадык камгалалының Өвүр кожуунда албан черлеринде котелдарны болгаш оларның турар оран-саваларын аштап-арыглаар, будуур, септээр ажылдар чоруттунган. Одалга системаларын база аштап-арыглаан. Эмнелге черлери одалга сезонунга чедир 60 хуузу белен. Хөмүр сөөртүлгези ам-даа эгелевээн.
Бо хүнде эрткен одалга сезонундан чедери берге Саглы, Дус-Даг, Чаа-Суур, Сарыг-Хөл суурларда 4,8 тонна, а Хандагайты болгаш Солчурда 147 тонна хөмүр арткан.