ТР-ниң Чазааның Аппарат хуралынга 2024 чылдың одалга сезонунга белеткел ажылдарының дугайында чугаалашкан.
ТР-ниң Одалга болгаш энергетика яамызының илеткээни-биле алырга, 2024 чылдың одалга сезонунга белеткел ажылдары график езугаар чогуур үе-шаанда боттанып турар. Ажылдың 45 хуузу белен. Одалга-энергетика комплекизиниң объектилериниң кышка белеткели – 38 хуу болза, ЧКА-ның 28 хуу, а социал адырда албан черлериниң – 18 хуу боттанган болуп турар. Специалистерниң демдеглээни-биле алырга, социал адырның кышка белеткел ажылдары өскелерден аскап турар.
ТР-ниң Баштыңы Владислав Ховалыг кадык камгалалы биле күш-ажыл болгаш социал политика яамыларының удуртукчуларынга кышка белеткел ажылдарынче кичээнгейни угландырар даалганы берген.
«Чылыдылга системазы белен дугайында паспорттар сентябрь 15-ке чедир белен турар ужурлуг. Социал объектилерде ук ажылдар баш бурунгаар-ла доозулган турзун. Ук даалга хөй квартиралыг бажыңнарга база хамааржыр. Башкарылга компанияларының кышка белеткелинге хамаарыштыр ажылдарны хынаар органнарны кичээнгейге алыры чугула» – деп, регионнуң удуртукчузу демдеглээн.
Кышка белеткел ажылдарын организастаары-биле 1062 хемчег планда көрдүнген. Бо хүнге чедир оларның 205-и күүсеттинген. Онза кичээнгейде «ТЭК-4-түң» ажылы. Ол дээрге Чаа-Хөлдүң, Шагаан-Арыгның, Хову-Аксының болгаш Ак-Довурактың котельнаялары-дыр. Ол дөрт объектиниң котелдарының капиталдыг септелгези болуп турар. Оон аңгыда, 1,6 муң метр чылыг четкизин солаан. Ажылдың хөй кезиин күүсеткен деп болур.
Бистиң корр.
Чурукту интернеттен хоолгалаан.
"Шын" №54 2024 чылдың июль 20
![](https://shyn.ru/media/cache/2024/07/21/0-wzeyyt8azlxvdxfucezms7avef9fivnlnishqefcatk4b0rblxi31hzn-fnhcvrgwhy7sc-bjpbmki0ulatts4-4dd70d16a4.jpg)