«АГРОТУРИЗМ»
РФ-тиң Көдээ ажыл-агый яамызы көдээ туризмни сайзырадыр сорулга-биле арат-фермер ажыл-агыйларынга «Агротуризм» федералдыг мөөрейни чарлаан. Тываның көдээ ишчилерин база ол федералдыг мөөрейге киржирин сүмелеп турар.
Көдээ туризмни сайзырадыр мөөрейге киржир чагыгны май 16-дан 20-ге чедир хүлээр. Күрүнеден деткимче алыр мөөрейге республиканың арат-фермер ажыл-агыйлары, көдээ сайгарлыкчылар киржип болур.
Мөөрей киржикчизиниң бодунуң төлевилелинге киирген акша-хөреңгизиниң хемчээлинден күрүне деткимчезиниң түңү хамааржыр, 3-тен 10 миллион чедир рубль болур. Грантының эң-не улуг түңүн 10 хуудан эвээш эвес акша-хөреңги салган хуу сайгарлыкчылар ап болур.
Төлевилелдер туристер хаара тудар объектилер тургузарынче, турисчи дериг-херекселдер эптеп кылырынче азы садып алырынче, девискээрлер чаагайжыдарынче дээш өске-даа сорулгалыг ажылдарже угланган турар ужурлуг. Турисчи бизнези ажылдап турар хуу сайгарлыкчылар ажыл-агыйын ам-даа улгаттырып алыр аргалыг.
Россияга 2022 чылда көдээ туризмни сайзырадыр 50 төлевилелди шилиирин планнап турар. 2023 чылда РФ-тиң Көдээ ажыл-агыйы ооң акшаландырыышкынын 500 миллион чедир өстүрерин көрүп турар.
Мөөрейге киржир айтырыглар бар болза, Тыва Республиканың көдээ ажыл-агый кооперативтери болгаш фермер ажыл-агыйын сайзырадыр фондунуң 2-62-22 дугаарлыг телефонунче долгаар.
Чурукту интернет четкизинден алган.