«Чоннуң оолдары» шимчээшкининиң кежигүннери «Өгбелеривистиң маадырлыг чоруун катаптаалыңар» деп кыйгылыг "Кызыл кош" акцияны чарлаан. Украинага тускай шериг операциязында киржип турар дайынчыларны бо кадыг-дошкун үеде деткээн акцияга шериг албан-хүлээлгелиг оолдарның авалары болгаш эриг баарлыг чон демнии-биле каттышкан.
“Этноковоркинг” төвүнүң шеверлери өлчей удазыны-биле каастаан таалыңнарны дүн-хүн дивейн даараан. Шериг албан-хүлээлгелиг оолдарның өг-бүлези, ада-иези, дөргүл-төрелдери ооң иштинге аъш-чем, арыгланып-аштаныр чүүлдер, далган-тараа, артыш, ыдыктыг тариналар ораап каан кадактар, эм-таң, чылыг хеп, кидис идик оъду, бут ораашкыннары дээш өске-даа барааннарны хуваап, дүптээн. Авалар дайынчыларга эптиг болуру-биле арбай далганында чигир, ааржыны база баш бурунгаар холуп каан.
Бистиң тиилелгевис дээш тыва чондан бирги хереглелдиң барааннары-биле дүптээн 20 таалың база 30 шоодайны Украинаже чорудар. Хары черде тускай шериг операциязын күүседип турар тыва шериглер төрээн чериниң болгаш чонунуң деткимчезинден күчү-күштү ап, оларның хей аъды, сүлдези кезээде бедик чоруур.
– Тыва чоннуң эптиг-демнии, ада кижиниң оглу дээш чоргааралы, эриг баарлыг ие кижиниң төлү дээш энерел сеткили кызыгаар чок улуг күш болурун бо хүннерде көрүп тур бис. Ак чемин, тараа-далганын, артыш-оъдун эккеп турар биче сеткилдиг чонувус дыка-ла хөй-дүр.
Тыва кижи чер чоруурда, таалыңныг, артынчактыг болурга онча-менди, олча-омактыг кээр болгай. Шевер херээжен чонувус дүн-хүн дивейн, шериг оолдарга таалыңнарны йөрээл сөстери-биле домнавышаан, дааранып олурарын көөрге, эргим-дир – деп, «Чоннуң оолдары» шимчээшкининиң кежигүнү Сайдаш Монгуш соцчеткилерде бижээн.
Таалыңнарны шериг хандырылгазынга хамаарышпас, бирги хереглелдиң барааннары-биле дүптээн. Баштайгы чүъктү Кызыл хоорайның оң талазында 55-ки даг-адыгжы бригадазының шериг кезээнче дамчыткан.
"Кызыл кош" акцияга дыка хөй улус катчып келген. Тываның Аныяк малчыннар эвилели, хууда сайгарлыкчылар дээш оон-даа өске эриг баарлыг улус база улуг деткимчезин көргүскен.
Тиилелгевис дээш! Россиявыс дээш! Тыва чондан!
#Ачы_дузаакциязы #Кызылкош #ТМГМедээлер #Тыва #Тывамедээ #Тывадыл #Тывамедиагрупп #Тува #Tuva #TMG #TMGNEWS #Tuvanews