Март 15-те Улусчу чогаадылга бажыңынга Тываның ойнаар-кыстар кылыр шеверлериниң делгелге-мөөрейи болуп эртер. Ону Республиканың улусчу чогаадылга болгаш дыштанылга төвү Культура яамызының деткимчези-биле эрттирип турар. Ук хемчег Бүгү-делегейниң ойнаар-кыстар кылыр шеверлер хүнүнге, Тывада чарлаттынган башкы болгаш дагдыныкчы чылынга, Чоннуң демнежилге чылынга тураскааткан.
Мөөрейге 15 хардан өрү назылыг шеверлер, чогаадыкчы коллективтер, бөлгүмнер киржикчилери киржир. «Чаңчылчаан азы улусчу ойнаар-кыс», «Авторнуң ойнаар-кызы», «Сувенир ойнаар-кыс» деп номинацияларга тергиин ажылдарны илередир. Делгелге Улусчу чогаадылга бажыңының фойезинге март 15-те 11.00 шактан 16.00 шакка чедир ажылдаар, аңаа чон сонуургаан ойнаар-кызын садып алыр аргалыг болур.
Улусчу чогаадылга болгаш дыштанылга төвү ук хемчегни 2021 чылдан тура эрттирип турар. Эрткен чылын мөөрейге 300 ажыг ажылдарны 70 шевер көргүскен. Оларның аразындан он ажыл тергиин деп санаттынган. Тожудан Лопаа Эдуардтың «Мөөрейжи» деп ажылы, Арыг-Бажы суурдан Светлана Тютюгинаның папье-маше деп техника-биле кылган ойнаар-кыстар коллекциязы, Кызыл кожуундан Алдынай Хомушкунуң «Скиф кадын» деп ажылы номинация аайы-биле бирги черлерни ээлээннер.
Сөөлгү үеде тыва чон бодунуң чаңчылдарын диргизип, кадагалаарынга улуг сонуургалдыг апарганы-биле ойнаар-кыстарны өг-бүле болгаш ниити байырлалдарга белек кылдыр садып ап турары өөрүнчүг деп шеверлер айтып турар. Делгелге-мөөрейниң сорулгаларында мастерлерни деткиири, сувенир продукциязын сайзырадыры, национал костюмну, чаңчылдарны ойнаар-кыстар таварыштыр делгередиринден аңгыда, уруглар садтарынга тыважыткан ойнаар-кыстарны сайзанактап ойнаарынга өөредип, аныяк-өскенни хол-биле кылыр ажылдарга сундуктурары, ойнаар-кыстар дузазы-биле чаш төлдүң кудун доктаадып, ооң чажыт күжүн чонга билиндирери база тыва чоннуң материалдыг өнчүзүн кадагалаары көрдүнген. Тыва сувенир продукцияларының аразынга ойнаар-кыстар быжыг турушту ээлеп, оларны таварыштыр тываларның чараш, онзагай культуразынга сонуургалды күштелдиреринге «Ойнаар-кыстар хүрээлеңи» идиг бээр деп организакчылар демдеглеп турар.
/ Виктория АЙМАА,
Республиканың улусчу чогаадылга болгаш дыштанылга төвүнүң килдис эргелекчизи.
