Бөгүн Кызыл хоорайның төвүнде Арбат шөлүнге Республиканың психиатрия эмнелгезиниң ажылдакчылары Психиктиг кадыкшыл хүнүнге тураскааткан акцияны эрттирген. Аңаа янзы-бүрү мөөрейлер, викторина болгаш чыылганнар аразынга “Молекула” деп шимченгир оюну база организаастаан. Оон аңгыда хууда айтырыглыг улуска ол-ла черинге консультацияны база чоруткан.
Саяна Кызыл-ооловна Иргит (Республиканың психиатрия эмнелгезиниң херээжен улус эмнедир салбырының эмчи сестразы):
-Бөгүн бис, эмнелге ажылдакчылары, хөй кижи мында 14 шактан тура акцияны демнежип эрттирип турарывыс бо. Чоннуң киржилгези хөй, ылаңгыя аныяктар аажок идепкейлиг киржип турлар. Шак мындыг акцияларны удаа-дараа эрттирер болза эки деп бодаар мен. Чүге дээрге сөөлгү үеде чоннуң психиктиг кадыкшылы баксырап турар. Аарып турар улустуң хар-назыны аныяксып бар чыдарын, аныяктар аразында бодунуң амызынга четтинер чыгыы байдалга кээп турар улустуң санының өзүп турарын дүвүрел-биле эскерип турар бис. Ылаңгыя херээжен улус колдап турары хомуданчыг. Аарыгның кол чылдагааны стресс болуп турар. Ынчангаш шак мындыг акциялар дузазы-биле бо айтырыгже хөйнүң кичээнегйин угландырып турарывыс ол.
Эмчилерниң сүмелеп турары-биле, кандыг-даа нарын айтырыг тургустунуп келгенде, хөлүн эрттир муңгаралга алыспайн, чүгле бодунга шыгжап чорбайн, чоок улузу азы эмчилерге-даа келгеш, арга-сүмеден айтырып ап турар болза эки. Ол ышкаш спортка хандыкшылдыг, кезээде эки бодалдар бодаар кижилер кажан-даа бергелерге алыспас дээрзин билзе чогуур деп эмчилер чугаалап турар.
К. Монгуш
чуруктар авторнуу
