Тудуг адыры-биле таныжылганы ТР-ниң Чазааның Даргазының оралакчызы Олег Лукин уламчылап турар.
Мергежилдиг ажылчыннарның чедишпези – адырның эң чидиг айтырыы, тудуу адакталып, шеверлел ажылдары эгелээн тудугларда мергежилдиг ажылчыннарның чедишпези илези-биле көстүп турарын ол медеглээн.
– Тудуг-монтаж ажылдарының төнчү чадазынче үнүп келгенде, мергежилдиг ажылчыннарның чедишпези көстүп келир – деп, ол тайылбырлаан. – Чижээлээрге, шеверлекчилер, электромонтерлар чедишпес болур-дур.
ТР-ниң Чазааның Даргазының оралакчызы албан-дужаалынга Олег Лукинни Владислав Ховалыг август 16-да томуйлаан. Мооң мурнунда ол электри четкилериниң компанияларынга удуртукчу албан-дужаалдарны ээлеп чораан. Амгы үеде ол ажыл-херектер-биле таныжып, ТР-ниң Чазаанга харыылаар апаары тудуг адырын (а ол ышкаш энергетиканы) хүлээп ап турар.
– Тываның эрге-чагыргалары социал инфраструктураны хөгжүдери-биле федералдыг акша-хөреңгилерни киириштирериниң талазы-биле арга-хоргаларны билдилиг ажыглап турар – деп, О. Лукин демдеглээн.– Тывада 11 школаны тудуп турар. Оларның дөртүн чыл төнчүзүнге чедир дужаар ужурлуг.
Балгазын суурда өөредилге чериниң оран-савазы барык белен. Керээлиг организация «Өлчей» компания оран-савада шеверлел ажылдарын эгелээн. Үшкү каътты тудупкаш, ооң даштын шеверлеп кириптер. Дээвиирлерниң болгаш шывыгларның эптелгези артар. Керээлиг организация ону август төнчүзүнге чедир доозуптарын аашкынып турар.
Балгазын суурда школаның тудуун эрткен чылын эгелээн. Бо хүннерде ында 88 кижи ажылдап турар. Оралакчы дарганың үнелели-биле алырга, ол хире санныг ажылчыннар ажылга күш четпес. Тываның Тудуг яамызы немелде ажылчыннарны тудугга хаара тудар ужурлуг. Чамдык социал объектилерге септелге дооступ турда, дыка хөй ажылчыннар хосталыр, олар, чугаажок-ла, чаа керээлер чарарынга сонуургалдыг болуру чадавас.
“Чыл төнчүзүнге чедир дужаары көрдүнген дөрт школаның белениниң деңнели бедик. Оларның дужаалдазының хуусаалары улуг дүвүрелди болдурбайн турар. Ынчалза-даа эдип чазаарын негээр ажылчын байдалдар бар – деп, О. Лукин чугаалааан. – Ниитизи-биле байдал шиитпирлеттингир, мергежилдиг ажылчыннар айтырыын шиитпирлеп тур бис”.
А. ХЕРТЕК белеткээн.
Чиңгис СААЯНЫҢ тырттырган чуруу.
"Шын" №61, 2023 чылдың август 19