Эрзин кожууннуң Мөрен сумузунда олут олурбас кижилер хөй. Оларның бирээзинге Санчымаа Бичелдей хамааржыр. Бо хоочун бажыңының девискээринде ногаа аймаан шуптузун тарып турар. Дыка-ла кызымаккай кижилерниң бирээзи-дир. Зинаида Доржуевна Намдакты база демдеглеп болур. Ол база ногаа-чимизин тарып өстүргеш, дүжүдүн дузап, болбаазыраткаш, артыкшылдыын кырганнарга бээр кижи. Раиса Минчинмааны, Люся Номчу-Белекти, Мая Баажайны база идепкейжи ногаажылар санынче киирип болур.
Мөрен суурнуң уруглар садының эргелекчизи Дариймаа Ликтановна Чалзырайның ажылы база мактаксанчыг. Ооң удуртулгазы-биле коллективи уруглар садының девискээринде янзы-бүрү чечектерни, ыяштарны, ногааларны тарып турар. Чаштарның ойнаар черин дыка чараш каастап кылган.
Идепкейжи башкыларывыс база бар: Айлаң Самбуевна Баанай, Шеңне Бады-Шулууевна Тангыт дээш оон-даа өскелер. Школаның улуг повары Эльвира Сигенковна Ижи дузалакчылары-биле уругларга таарыштыр амданныг чемнерни хүн бүрүде кылып турарлар. Оларның ажылдап турар чери арыг-силиг, чылыг-чырык.
Ол ышкаш бистиң суурнуң ногаажыларынга кудук казып берип чоруур оолдарывыс бар. Валентин Дүдүп биле Белек Мижит-оолга өөрүп четтирип чоруур бис.
Бо эрес-кежээ чаңгыс чер чурттугларымга моон-даа соңгаар эки ажылдаарын күзеп каайн.
Чечекмаа САДИ.
Эрзин кожуун, Мөрен суур.
“Шын” №95 2023 чылдың декабрь 13