Декабрь 3 – Бүгү-делегейниң инвалидтер хүнүн чер-черлерде чылдың-на демдеглеп турар.
Чүгле ол хүн эвес, бүдүн ай дургузунда хөйнүң кичээнгейин кадыының байдалы-биле кадык кижилерден бичии ылгалдыг-даа болза, кымдан артык быжыг тура-соруктуг, бурунгаар дидим чүткүлдүг, боттарының үлегерин хөйге көргүзүп чоруур чанывыста кайгамчык кижилер хаара тудар.
Кадыының байдалы кызыгаарлыг улуска янзы-бүрү спортчу хемчеглер, солун кижилер-биле ужуражылгалар бо ай дургузунда чарлаттынган.
Хөйге билдингир “Тыва” ансамблиниң артистери бо чарлаттынган айда Кызылдың 10 дугаар школа-интернадының болгаш Спутник микрорайонда школада дыңнаары багай сургуулдарга боттарының кончуг солун концерт программазын бараалгадып, уруглар болгаш школаның башкылары-биле ужуражылганы кылган.
Ол ужуражылга үезинде школачылар тыва хөгжүм херекселдери-биле таныжар аргалыг болганнар. Тыва артистерниң эки сеткил сиңген солун оюн-көргүзүүн, тыва улустуң ырларын сургуулдар дыка онзазынган.
Бистиң корр.
Чурукту интернет четкизинден алган.
“Шын” №48 2025 чылдың декабрь 11
