Тыва Республиканың Чазааның 2022 чылдың май 24-те 262-р дугаарлыг айтыышкынын үндезин кылгаш, Тыва Республиканың девискээринде кижилерниң өнчү-хөреңгиге үндүрүглериниң чыылдазын көвүдетпишаан, Тыва Республиканың каттышкан бюджединде чедишпес түңнү эвээжедип, ону долдурар сорулга-биле июньнуң 1-ден июль 1-ге чедир өнчү-хөреңги үндүрүглерин чыыр шалыпчы айны эрттирерин чарлаан. Ол үеде кижилерниң өнчү-хөреңги, чер база транспорт үндүрүглеринде өрелерин эвээжедири планнаттынган.
Россияның Федералдыг үндүрүг албанының Тыва Республикада эргелелиниң дыңнадыы-биле алырга, 2022 чылдың май 1-ге чедир 187,6 млн рубль түңнүг өнчү-хөреңги өрези төлеттинмээн. 27,0 млн рубль (14 хуузу) кижилерниң өнчү үндүрүүнге, 50,0 млн рубль (27 хуузу) – чер үндүрүүнге, 110,4 млн рубль азы өрениң 59 хуузу транспортка үндүрүг өрези болуп турар.
Үндүрүглерде кандыг өрелер барын дараазында аргалар-биле көрүп болур:
- Федералдыг үндүрүг албанының сайтызында «Үндүрүг төлекчизиниң хууда өрээлинден”;
- күрүне ачы-дузазының порталындан;
- хөй талалыг ажыл-чорудулгалыг төптен;
- үндүрүг органындан www.nalog.gov.ru;
- “Кижиниң үндүрүглери” мобильдиг капсырылгадан (iOS база Андроид: App Store база GooglePlay платформаларда).
Федералдыг үндүрүг албанының сайтызында «Үндүрүг төлекчизиниң хууда кабинеди”; күрүне ачы-дузазының порталы; хөй талалыг ажыл-чорудулгалыг төп gosuslugi.ru; кредит албан чери; почта салбыры таварыштыр үндүрүглерде өрелерни төлеп ап болур.
Айтырыглар тургустуна берзе, Россияның Федералдыг үндүрүг албанының Тыва Республикада эргелелиниң (Кызыл хоорай, Московская кудумчузу, б.8) дараазында телефоннардан айтырып болур: 8 (394-22) 9-41-71, 9-41-65, 9-42-58, 9-41-57 – 9.00 шактан 18.00 шакка чедир, а дүштеки чапсары – 13.00 – 14.00 шакта.
Чурукту интернет четкизинден алган.
Бистиң корр.