Сүт-Хөл кожуунга энергетиктер биле суд приставтары рейд кылып кээп чорда, бир хамааты бодун өрелиг деп бүзүрээн.
Суг-Аксы суурнуӊ чурттакчызы элекри энергиязын ажыглап турза-даа, ооӊ өртээн 2017 чылдыӊ июньдан тура төлевээн. Түӊнелинде, 24 муӊ рубль өрелиг апарган. Манавааны аалчыларын көрүп кааш, ол хамааты аргаже чаштып, дезип чоруй баарын оралдашкан. Ынчалза-даа суд приставтары билдилиг хөделип, ону арга иштинден тып алгаш, чедип келген.
Өрелиг ээзиниӊ харыысалга чогу-биле, инектери – долаа-залог апарган. Суд приставтары 3 баш бода малды хураап, хоругдаан.
Азырал малыныӊ салым-чолу ам чүгле ээзиниӊ медерелдиинден хамааржыр. Баштай өртек-үнезин тодарадыр ажылды чорудар, ооң соонда өрелиг кижи он хонук дургузунда өре-ширезиниӊ айтырыгларын таарыштыр шиитпирлээр ужурлуг. Бир эвес өрезин төлээри-биле кандыг-даа базым кылбас болза, инектерни «чиик өртекке» садыптар.
Ынчалза-даа ол хамааты энергетиктерде өрези-биле дораан санажып ап болур. Ынчан күүселде херээн соксадыптар, а инектерни ээзинге эгидип бээр.
Ол өрелиг кижиге таарымчалыг шиитпир деп чугаалаза чогуур, чүге дизе мал өнчүнү үнелээрде, рынокта өртээнден көӊгүс эвээш кылдыр санаар.
Энергетиктер биле суд приставтары чүгле 3 хүн дургузунда кады ажылдааш, 269 күүселде херектери-биле шүүштүрүлге ажылдарын кылган.
Үстүнде айыткан инектерден аӊгыда, өрелиг сүт-хөлчүлерниӊ өске-даа эт-хөреӊгизин хураап, хоругдаан.
Электри энергиязын үезинде төлевээниниӊ ужурунда, ону өжүрүп кааптарындан аӊгыда, эт-хөреӊгизин хураадып болур дээрзин энергетиктер сагындырып турар.
Өрелиг кижиниӊ банкыда агар санын ажыглаарын хоруп болур. Шимчевес өнчү-хөреӊги болгаш транспорт-биле дугуржулгалыг ажыл-херек кылырын база хоруп болур.
Чүгле ындыг дээштиг хемчеглер кылган соонда, чүү-даа болуп турар болза, электри энергиязы дээш төлээр апаар деп чүүлдү хамаатылар билип турар, харыысалгадан арга иштинге чаштыры-даа болдунмас.
Рейд үезинде чаӊгыс-даа дириг амытан когараваан.
"Тываэнергосбыт" ниитилели.
Чурукту интернет четкизинден алган.