Кызыл хоорайның девискээринде орук тудуунуң ажылдары уламчылап турар. 2024 чылдың чазын Кызыл хоорайдан Вавилин ээтпээнче баар орукту септеп эгелээн турган. Июль 16-да Улусчу фронтунуң төлээлери ТР-ниң Орук транспорт яамызының кылган ажылын хынап четкен.
Улусчу фронтунуң даргазының дузалакчызы, «Айыыл чок оруктар» национал төлевилелдиң Тыва Республикада координатору Сергей Белоусов:
– Кызыл хоорайның оруктарын тус черниң чурттакчы чонунуң чагыын езугаар кылып турар. Вавилин ээтпээнче орукту чаартыр дугайында Улусчу фронтуга чондан дилег киирген турган. Чазын Орук-транспорт яамызы-биле келгеш, бо оруктарның хемчээн алыр дугайында чугаалашкан бис.
ТР-ниң Орук-транспорт яамызының сайтызынга, Кызыл хоорай чагыргазының социал четкиде блогунга, Улусчу фронтуга чагыгларны киирип болур. Чоннуң киирген чагыгларынга даянгаш, кайы орукка хамаарыштыр хөй дилеглер, хомудалдар киргенил, ол орукту мурнады кылып эгелээр. Хоорайның шупту оруктарын чаңгыс угда кылып эгелээри болдунмас. Ынчангаш бичиилеп кылып турары ол. Чогум орук септелгези планда көрдүнген боор. Чамдык оруктарны кылыр бетинде чоннуң бадылаашкынын база өөренип көөр.
Орук-транспорт яамызының кол инженери Күдер Сат:
– 2023 чылдың октябрь айда Вавилин ээтпээнче орукту чаартыр дугайында керээни чарган турган. Оруктуң септелгези долузу-биле доозулган. 10 дугаар километрге чедир төлевилел үш аңгы чадалыг. Бирээде, хоорайның солагай талазынче кежип кээрге, дескинип чоруур долгандырыг оруктан тура 55-ки гвардейжи бригада кезээниң хериминиң ужунга чедир дөрт автомашина чоруур калбак орукту кылыр. Ийи дугаар чадазы болза, ооң соонда 6,5 дугаар километрге чедир ийи чычаан каржып эртер орукту кылыр.
Айдың ОНДАР.
Буян ООРЖАКТЫҢ тырттырган чуруктары.
"Шын" №53 2024 чылдың июль 17
![](https://sun9-80.userapi.com/s/v1/ig2/wJ6BNMpJog7lwSt7DE-u31_hfFUVRwQxCxcxY5ShBjrDwWFY_YhH8FXeodfpt_BuHgzncXdRXD3-A8BeBZhg4LL4.jpg?quality=95&as=32x21,48x32,72x48,108x72,160x106,240x160,360x240,480x319,540x359,640x426,720x479,1080x719,1280x852&from=bu&u=6C0L8GTFH8kalmDuKwo7dKGbfoe6MlLGScys2mZsZSM&cs=807x537)
![](https://sun9-78.userapi.com/s/v1/ig2/gW2Lux2rNJWsBvsY8LOTd_YaF3HelItZ4E51NqO00sFIDeJ23-4xfY-4YfzCtrr6LjfCJ1IVuRUQhq6H2XxjvS14.jpg?quality=95&as=32x33,48x49,72x74,108x111,160x165,240x247,360x371,480x495,540x557,640x660,720x742,907x935&from=bu&u=6G8ZG-Ltim5QBd1OdC-Tz_H0kZM-U9cM9alXG41QqGA&cs=907x935)
![](https://sun9-7.userapi.com/s/v1/ig2/LZw2f3Cbz3t8ZQJa7ExYxKzBpfL4ClQGJg3lVf7d07pnP_m_yZmznAk7pBGWcWcQd8DXzs_ZV_H5KXhpJDjeJWgF.jpg?quality=95&as=32x21,48x32,72x48,108x72,160x106,240x160,360x240,480x319,540x359,640x426,720x479,1080x719,1280x852&from=bu&u=c0FnvszJNhGQEuZowkM2pnPgyS8Ouaqpay7KN9zvU3w&cs=807x537)
![](https://sun9-64.userapi.com/s/v1/ig2/XQhDnLbN3npAKZ7egog7joLcOWMKnqVhldiLxj1D1aAj7QTfoGmWKV-P9j9zjclKZZHB_gU52G-B0MB6sjWpQC8V.jpg?quality=95&as=32x21,48x32,72x48,108x72,160x106,240x160,360x240,480x319,540x359,640x426,720x479,1080x719,1280x852&from=bu&u=H-loTROYK3ULixGAjpyRCKAY5hNGInn650M92EmKXzk&cs=807x537)
![](https://sun9-72.userapi.com/s/v1/ig2/TQlFu5darE-B17j-3zkQKSr4kVyGHzziOwmTSuoIbMSoCRoS1g9moZbX6xyV6xS_0M6-bWcJ7oIO9PXoinWut56U.jpg?quality=95&as=32x21,48x32,72x48,108x72,160x106,240x160,360x240,480x319,540x359,640x426,720x479,1080x719,1280x852&from=bu&u=wsRq7kkDdpkHmvmPxhoZQ1QwxXRGGpeKlPrpxChYPWc&cs=807x537)