«Шынарлыг айыыл чок оруктар» национал төлевилелди боттандырарынга студентилер практика үезинде дузалажып турар.
Кызылдыӊ транспорт техникумунда орук кылыр мергежилди өөренип турар студентилер чылдыӊ-на бүдүрүлге практиказын «Шынарлыг айыыл чок оруктар» национал төлевилелдиӊ объектилеринге эрттирер.
Шиӊгээдип алган билиглерин практика кырынга көргүзери дээрге, келир үеде орук адырынга ажылдаар квалификациялыг специалистерни белеткээриниӊ чугула чадазы-дыр. Орук кылыр бүдүрүлгениӊ иштики ажылдарыныӊ онзагайын караа-биле көрүп, техникумга теория кырында шиӊгээдип алган билиглерин практикага ажыглап, билиин быжыглаар, ажылды кылып чаӊчыгар.
Бүдүрүлге чери билиг-мергежилдиг аныяк специалистерни ажылга киирип, боттарыныӊ одуруун чаа кадрлар-биле четчелээр аргалыг болур. Чүге дизе бүдүрүлге практиказын эки эрткениниӊ соонда, доозукчуну ажылче дораан хүлээп алыр байдалдар тургулаар.
Бо чылын Кызылдыӊ транспорт техникумунуӊ 150 ажыг студентилери чайгы практиказын «Суугу», Восток», «Орук-тудуг транспорт» деп бүдүрүлгелерге эрттирер. Ортумак шалыӊы 30–40 муӊ рубль-даа болза, ажылдыӊ нарынын болгаш ак сеткилдиг ажылдаанын көрүп тургаш, шалыӊын өстүрүп болур.
Студентилер эрткен чылын Кызыл – Сарыг-Сеп, Кара-Хаак суурже кирер орукту, «Кызыл – Вавилин ээтпээ» деп автобус маршрудунуӊ Пушкин кудумчузунда оруун септээр ажылдарга киржип турганнар.
Практика үезинде олар кылып турары автомобиль оруун кылганының, ооӊ төлевилелинге дүгжүп-дүүшпейн турарын хынаар.
Национал төлевилелдерниӊ аӊгы-аӊгы объектилеринге, оон аӊгыда, Кызылдыӊ Колхозная, Каменистая кудумчуларында, Каа-Хем суурда автооруктарныӊ септелгезинге киришкеш, студентилер арга-дуржулга кирип ап турарлар.
Орук шывыыныӊ кызыгаарын тодаргай көргүзер геодезияныӊ GPS херекселин ажыглап өөренип алырга, шинчилелдер кылыр, ажылдаар үе-шакты камнаар, күш-ажылдыӊ чарыгдалын эвээжедир дээрзин олар шиӊгээдип алган.
Келир үениӊ кадрлары, эртеминиӊ аайы-биле диплом ажыл бижиирде, бүдүрүлге практиказын орук тудуунга эрттирип турар. Ындыг хемчег орук адырыныӊ профессионал мергежилиниӊ чугулазын медереп билиринге чугула.
/ Орук-транспорт комплекизиниң яамызыныӊ медээзи-биле Р. ДЕМЧИК белеткээн.
"Шын" №44 2023 чылдың июнь 17
