2023 чылдың төнчүзүнге чедир федералдыг орукчулар беш объектиге ажылдарны доозар, ооң бирээзинге узуну барык беш километр оруктуң үндезин септелгези хамааржыр.
Ук ажылдарны Өвүр кожуунда чорудуп турар, «Енисей» Р-257 оруктуң 1061–1066, 1105–1110 болгаш 1115–1116 километрлеринде орук кезектерин калбарткан. Ында ажылдап турар специалистер орук шывыын солуур, орук кыдыын болгаш кюветтерни быжыглаар.
Чаа шывыгның дөжээ кылдыр асфальтогранулобетонну ажыглаар, ооң кырынга асфальтобетоннуң ийи каъдын чадар. Ындыг арга орук чадыының ажыглаар хуусаазын ийи катап көвүдедир.
Орук шимчээшкининиң айыыл чок чоруун хандырары-биле, чаагайжыдылга ажылдарын кылып чорудар: шаптараазынның чаа чалдарын, демдектерин, медээлээр чагыларны тургузар, ол ышкаш чаа шыйыгны чуруур.
1061-ден 1066-гы километрниң оруктарының үндезин септелгезин чорудуп тура, ону калбартып, суг эрттирер хоолайларны, кудуктарга шүүрлерни салыр.
Кылымал дериг-херекселдерге ажылдар база уламчылаар: бо чылын Өөк, Хөндергей хемнерни, оруктуң 651-ги километринде кара-сугну кежилдир көвүрүглерни ажыглалга киирер. Септеттинген көвүрүглерниң ниитизи-биле узуну 150 погон метр болур.
Кылымал дериг-херекселдерге көвүрүг дөжээн специалистер солуур, ооң шывыын сайлыг асфальтобетондан кылыр, чал чагыларын быжыглаар, шаптараазын чалдарын чаартыр, чаа орук демдектерин шыяр. Оруктуң 651-ги километринде кара-сугну кежилдир көвүрүгнүң ийи талазынга чаа чагыларны кагар, ындыг чүүл ону калбартыр болгаш орук шимчээшкининиң айыыл чок чоруун көскүзү-биле бедидер.
Экологтуг ажыл-хемчеглерже база улуг кичээңгейни чидиглендирер: оларның дөгерезинге суг шүүрээр херекселдерни тургузар.
«Енисей» автоорук эргелели түр үениң таарымча чок байдалдарынче чолаачыларны билиишкинниг көөрүн, шаптараазыннарны оюп эртер оруктар-биле чоруун уламчылаарын дилеп турар. Септелге чоруп турар черлерге чоокшулап келгеш, машина-балгаттың дүргедээшкинин эвээжедип, доктааткан хемчеглерни сагыырын сагындырып турар.
/ Орук-транспорт яамызының медээзи-биле А. ХЕРТЕК белеткээн.
"Шын" №40 2023 чылдың июнь 3
